«Բարգավաճ Հայաստան» կուսակցության նախագահ Գագիկ Ծառուկյանը շարունակում է հանդիպումների շարքը ինչպես քաղաքական տարբեր ուժերի, անհատների ու հասարակական կազմակերպությունների, այնպես էլ արտախորհրդարանական կուսակցությունների ներկայացուցիչների հետ:
Տիգրան Կարապետյանի գլխավորած «Ժողովրդական» կուսակցությունը համաժողովրդական շարժմանը միանալու, դեպի արդար պետականություն ու արդար իշխանություն գնալու վճռականությամբ է համալրում շարժման շարքերը՝ պատրաստ ոչ իշխանական երեք ուժերի կողքին կանգնել մինչև վերջ:
«Եկել է բոլոր տարակարծությունները մի կողմ դնելու, բոլորի ջանքերը միավորելու ժամանակը»,-իր խոսքում նշեց Տիգրան Կարապետյանը:
«Շարժման գրասենյակները բաց են բոլոր այն ուժերի ու անհատների համար, ովքեր կիսում են մեր մտահոգություններն ու ցանկություն ունեն նվիրված աշխատելու»,-դիմելով «Ժողովրդական» կուսակցության ներկայացուցիչներին՝ նշեց Գագիկ Ծառուկյանը:
Կարդացեք նաև
«Անկախ նրանից, թե որ ուժի կամ գործչի նկատմամբ դուք ինչ կարծիք ունեք, պետք է նրանց վերաբերվեք հարգանքով: Նույնը վերաբերում է նաև իշխանություններին: Մենք չենք հավաքվել հայհոյելու, մարդկանց վիրավորելու համար, դա ոչ ոքի պատիվ չի բերում, մեր խնդիրը երկիրն այս վիճակից հանելն ու մարդկանց հավատը վերականգնելն է»,- նշեց Գագիկ Ծառուկյանը:
«Ոչ մի կուսակցություն ու անհատ ի զորու չէ երկրի ու ժողովրդի առջև ծառացած խնդիրները միայնակ լուծել, ուժն ու հաղթանակը միասնության մեջ են»,-հրաժեշտից առաջ կրկին անգամ համոզմունք հայտնեց Գագիկ Ծառուկյանը՝ հավելելով, որ պատրաստ է գործակցելու երկրի ճակատագրով մտահոգ յուրաքանչյուր քաղաքական ուժի ու անհատի հետ:
«Բարգավաճ Հայաստան» կուսակցություն
