Այս ուտեստը կարող եք մատուցել ե՛ւ որպես խավարտ՝ որեւէ մսեղենի հետ, ե՛ւ որպես ինքնուրույն ճաշատեսակ՝ աղցանի հետ: Շատ համեղ է, սննդարար եւ օգտակար:
Անհրաժեշտ մթերքները
Ծաղկակաղամբ- 1-2 կգ
Ձու- 3-4 հատ
Կաթ կամ կաթնասեր- 1 բաժակ (կամ կես բաժակ կաթ, կես՝ կաթնասեր)
Կարագ-100 գրամ
Ալյուր-1 ճաշի գդալ
Համեմունքներ- սեւ եւ կարմիր պղպեղ, շաֆրան, համեմի սերմ, քարրի եւ այլն՝ ըստ ճաշակի
Աղ-ըստ ճաշակի
Կանաչի- 3-4 ճյուղ (ցանկալի է համեմ կամ մաղադանոս)
Սխտոր- ըստ ճաշակի (կարելի է նաեւ չավելացնել)
Դեղին պանիր-50 գրամ
Պատրաստման եղանակը
Կարդացեք նաև
Ծաղկակաղամբը մասնատել, լավ լվանալ, գոլորշու վրա շոգեխաշել՝ 8-10 րոպե: Մինչեւ ծաղկակաղամբը շոգեխաշվում է, պատրաստել թանձրուկը: Ձուն լավ հարել ալյուրի եւ համեմունքների հետ, որ գնդիկներ չմնան, քիչ-քիչ ավելացնել կաթի եւ կաթնասերի խառնուրդը, մանր կտրատած կանաչին եւ սխտորը:
Հրակայուն ամանը կարագոտել, վրան լցնել ծաղկակաղամբը, որի վրա կտրատել մնացած կարագը: Քանի որ շոգեխաշման ժամանակ աղ չենք կարող անել, աղը ավելացրեք ե՛ւ թանձրուկի, ե՛ւ ծաղկակաղամբի վրա: Լցրեք թանձրուկը ծաղկակաղամբի վրա, վրայից քերեք պանիրը եւ դրեք 180 աստիճան տաքացրած ջեռոցը: Քանի որ թանձրուկն, ըստ էության, իրենից ներկայացնում է սուֆլե, պետք է ջեռոցը շատ տաք չլինի, որ սուֆլեն բարձրանա:
Թողեք եփվի՝ մինչեւ պանիրը լրիվ հալվի եւ սուֆլեն բարձրանա: Գրատենը պատրաստ է լինում մոտավորապես 35-40 րոպեում, սակայն ուշադիր եղեք, կարող է ավելի արագ էլ եփվի, չթողնեք շատ մգանա:
Մատուցեք տաք-տաք, կարող եք վրան հավելյալ կարագ դնել մատուցելիս:
Բարի ախորժակ:
Պատրաստեց
ՄԵԼԱՆՅԱ ԲԱՐՍԵՂՅԱՆԸ
«Առավոտ»
22.11.2014
