«Լեհաստանը հավատարիմ է իր դիրքորոշմանը` հակամարտության գոտում զենք չի մատակարարում»,- այսօր` նոյեմբերի 24-ին, «Մամուլի ազգային ակումբում» իր դիվանագիտական առաքելության ավարտի կապակցությամբ կազմակերպված ասուլիսի ընթացքում հայտարարեց Հայաստանում Լեհաստանի արտակարգ եւ լիազոր դեսպան Զդիսլավ Ռաչիսկին:
Անդրադառնալով Չարենցավանում գտնվող «Լյուբավա-Արմենիա» հայ-լեհական համատեղ ռազմարդյունաբերական ձեռնարկությանը` նա նշեց, որ նրա սեփականատերն է Հայաստանի պաշպանության նախարարությունը. «Գործարանը զբաղվելու է այնպիսի ապրանքների արտադրանքով, որոնք ինքնապաշտպանության համար են օգտագործվում: Դժվար է պատկերացնել դեպք, երբ սաղավարտով կամ զրահաբաճկոնով կարելի է ինչ որ մեկին վնասել, եթե իհարկե դրանցով ինչ-որ մեկին չհարվածես»:
Զդիսլավ Ռաչինսկին հավելեց, որ Լեհաստանի դիրքորոշմամբ` ղարաբաղյան կոնֆլիկտի վերջնական լուծումը հնարավոր է այն դեպքում միայն, երբ շահագրգիռ կողմերը խաղաղ երկխոսություն ծավալեն: Այդ իսկ պատճառով Լեհաստանը կողմ է եւ աջակցում է ԵԱՀԿ Մինսկի խմբին. «Ցանկացած լարվածություն, որը կարող է տեղի ունենալ հակամարտող կողմերի շփման գծում, ինչպես նաեւ ագրեսիվ հռետորաբանությունը չի ծառայում հակամարտության խաղաղ կարգավորմանը եւ կայունության ապահովմանը: Նույնիսկ Եվրոպայում հարյուրամյա պատերազմը ավարտվեց համաձայնագրով, Հայաստանը եւ Ադրբեջանը դատապարտված են խաղաղության: Հայաստանը եւ Ադրբեջանը հարեւաններ են եւ աշխարհագրությունը չեն կարող փոխել, սակայն կարող են փոխել աշխարհաքաղաքականությունը: Այսօր անհրաժեշտ է այնպիսի հասարակություն, որը պատրաստ կլինի խաղաղության»:
Ամի ՉԻՉԱԿՅԱՆ
