Նոյեմբերի 25-ին Գորիսում շարունակվեց Թուրքիայի քաղաքացի Օսման Ուգուրլու և Վրաստանի քաղաքացի Ավթանդիլ Մատեաշվիլու դատավարությունը: Նրանք մեղադրվում են Հայաստանի և Վրաստանի տարածքով տարանցիկ դեպի Թուրքիա 860 կգ թմրամիջոցի տեղափոխման գործով:
Այս անգամ հարցաքննվում էին վկաները: Նրանցից Հայկազ Հովհաննիսյանը ներկա չէր նիստին: Նա սրտի վիրահատություն էր տարել և այժմ գտնվում է բժշկի հսկողության տակ: Ուստի նախաքննական մարմնին տված նրա ցուցմունքը, իր դիմումի համաձայն հիմք ընդունվեց:
Դատավոր Դավիթ Գրիգորյանը ամբաստանյալներին հարցրեց` դուք ձեզ մեղավոր ճանաչում եք առաջադրված մեղադրանքով: Նրանք պատասխանեցին` ոչ:
Սկզբից հարցաքննվեց Մեղրու մաքսակետի աշխատակից Էդիկ Զաքարյանը: Դատավորը նրան հարցրեց` դուք ճանաչում եք ամբաստանյալներին: Վերջինիս պատասխանը բացասական էր: Էդիկ Զաքարյանի պատասխաններից պարզվեց, որ բեռնատարը Մեղրու մաքսակետում ենթարկվել է զննման: Դրա ժամանակ Էդիկը նկատել է, որ մեքենայում օտար մարմին կա: Իսկ այդ ժամանակ մեքենայի վարորդ Ավթանդիլ Մատեաշվիլին փորձում էր զանգել ինչ-որ մեկին:
Հաջորդ վկան Ալբերտ Մկրտումյանն էր, ով նույնպես աշխատում է Մեղրու մաքսակետում:Նրան տված հարցերից պարզվեց, որ բեռի զննության ժամանակ, երբ նա կատարել է բեռի սկանավորում, բեռի մի մասի խտությունը շատ էր: Ինչ կա բեռի մեջ հարցին վրացի վարորդը պատասխանել է`ոչ մի բան, իմ մեքենային ձեռք չտաք: Ամբաստանյալների պաշտպանները Ալբերտին հարցրին վարորդի վիճակի մասին, նա ինչպես էր իրեն պահում: «Իմ կողմից հարցը մի քանի անգամ կրկնվել է, ինչ կա բեռի մեջ, իսկ դրանից վարորդը զայրացել է» ,-պատասխանեց Ալբերտը: Այնուհետև Ալբերտն այդ մասին ծանուցել է իր վերադասին:
Դատավորը Ալբերտին թե` մեքենայի մեջ օտար մարմին նկատելով, դուք բացել եք մեքենայի այդ հատվածը: Ալբերտը թե`այո, մասամբ բացել եմ, այդ գործում էլ ինձ ձեռք է մեկնել մեքենայի վարորդը:
Դատական նիստում հայտարարվեց, որ պետք է հրապարակվի Հայկազ Հովհաննիսյանի ցուցմունքը: Սակայն 2 կողմերը դրան դեմ գնացին: Նրանք պատճառաբանեցին, որ Հայկազը նույնպես պետք է վկայություն տա, որովհետև իրենց մտահոգող շատ հարցերի պատասխաններ են նրանք ակնկալում Հայկազից:
Նշենք, որ Օսմամ Ուգուրլուն և Ավթանդիլ Մատեաշվիլուն մեղադրանք է հարուցվել ՀՀ քրեական օրենսգրքի 266-րդ հոդվածի 3-րդ մասի 2-րդ մասով և 214, 215 հոդվածների 2-րդ մասով:
Դատական հաջորդ նիստը կկայանա դեկտեմբերի 11-ին:
Ալվարդ ՄԵՍՐՈՊՅԱՆ
