Նոյեմբերի 25-ին Հայաստանի Նկարիչների Միությունում շատ գեղեցիկ ու յուրահատուկ միջոցառման ականատեսն եղանք: Բացվեց սիրված նկարիչ ու մտավորական Խաչատուր Ազիզյանի հերթական ցուցահանդեսը:
Բացման ու ողջույնի խոսքով հանդես եկավ Հայաստանի Նկարիչների Միության նախագահ Կարեն Աղամյանը, որը հակիրճ ներկայացրեց նկարչին ու խոսեց նրա անցած ուղու մասին:
Շնորհակալական խոսքով հանդես եկավ Խաչատուր Ազիզյանը, որը հույս հայտնեց, թե կշարունակի ստեղծագործել ու հանրությանը ներկայացնել իր նոր ստեղծագործությունները:
Կարդացեք նաև
Խաչատուր Ազիզյանը 2008 թվականինից Երևանի գեղարվեստի ակադեմիայի կերպարվեստի ֆակուլտետի դեկանն է: Նրա աշխատանքները գտնվում են ՀՀ մշակույթի նախարարության, Հայաստանի ազգային պատկերասրահի ֆոնդերում, ԱՄՆ-ի Նյու Ջերսիի «Գարթ Դավիթսոն» թանգարանի հավաքածուում, Ֆլորենցիայի «Ռենեսանս» թանգարանի հավաքածուում, տարբեր երկրների մասնավոր հավաքածուներում:
Մեծ արվեստագետի մասին այսպես են խոսել մի շարք արվեստագետներ:
Փարավոն Միրզոյան՝ ՀՀ արվեստի վաստակավոր գործիչ. «Խաչատուր Ազիզյանի արվեստում նրբորեն միահյուսվում են անցյալն ու ներկան, պատրանքն ու իրականությունը, առերևույթն ու շոշափելին, էպիկականն ու անձնականը: Գույնն է նրա կտավների այն հիմնական արարիչը, որ ստեղծում է տրամադրություն, արտահայտում օրվա պահ և անգամ բույր: Եվ այս ամենին կենդանություն ու շունչ են հաղորդում լույսի ցոլքերը, որոնք կյանք են հաղորդում յուրաքանչյուր վրձնահարվածի»:
Սարո Սարուխանյան՝ արվեստաբան. «Գեղեցիկը Ազիզյանի արվեստում չի ընդհանրացվում պատկերի արտաքին մանրամասների հետ, գեղեցիկը նրա համար նաև լուսավոր մտքի ճախրանքն է, լավատեսության զորեղ, հնչեղ գամմայով հարազատ ժողովրդի լինելիության գաղտնիքներին հաղորդվելու մղումն ի ծնե»:
Մարտին Հուրիխանյան՝ լրագրող, հրապարակախոս. «Ի դեմս Խաչատուր Ազիզյանի գործ ունենք ինքնատիպ, ասելիքի խորքով առանձնացող, բաց նյարդով ապրող, գիծը` շարժումի, շարժումը` գույնի, գույնը` հույզի, հույզը` թրթիռի, թրթիռը` խոսքի, խոսքը` փիլիսոփայության վերածած արվեստագետի հետ, ում կտավներում կա դեպի Արարիչը տանող լույս, լույս, որն արդեն գույներից երանգների վերածված համանվագ է` գեղեցիկի, կյանքի, սիրո և արարումի փառաբանման»:
Գարիկ ԱՎԵՏԻՍՅԱՆ
Լուսանկարները` Սիրարփի Կարապետյանի
