«Ուղղակի հայտարարության անդրադառնալը ճիշտ չէ: Տվյալ դեպքում խոսքը գնում է իմպիչմենտի մասին: Իմպիչմենտի ընթացակարգը ենթադրում է որոշում,որտեղ պետք է շարադրված լինի քրեական այն հանցակազմը, որով մեղադրվում է երկրի գլուխը: Պատկերացնո՞ւմ եք առանց որեւէ նման տեքստի հայտարարությունների սկսենք պատասխանել: Կլինի փաստաթուղթ, կնայենք ու մեր տեսակետը կհայտնենք»,- Aravot.am-ին ասաց ԱԺ ՀՅԴ խմբակցության պատգամավոր Արծվիկ Մինասյանը՝ անդրադառնալով Սերժ Սարգսյանի պաշտոնանկության հարցը խորհրդարանի օրակարգ մտցնելու ԱԺ պատգամավոր Նիկոլ Փաշինյանի նախաձեռնությանը:
Հիշեցնենք, որ Նիկոլ Փաշինյանը «Ֆեյսբուքի» իր էջում հայտնել է. «ՀՀ նախագահի պաշտոնը զբաղեցնող Սերժ Սարգսյանին պաշտոնանկ անելու մասին» ԱԺ որոշման նախագծի տեքստը գործնականում պատրաստ է: Սրբագրման եւ խմբագրման աշխատանքներից հետո՝ ուրբաթ օրը այն կներկայացնեմ հանրությանը»:
Արծվիկ Մինասյանի կարծիքով, այս պահին իմպիչմենտի իրավական հիմք չի տեսնում.«Իմպիչմենտը քաղաքական պատասխանատվությունից տարբերվում է նրանով, որ քաղաքական պատասխանատվության ժամանակ կարող ես որեւէ հիմնավորում չդնել, պարզապես քաղաքական իրավիճակից ելնելով պահանջես: Իմպիչմենտը այդպիսին չէ: Ի դեպ, դրա համար ենք ուզում նաեւ սահմանադրական փոփոխություն, որ երկրի գլուխը, կառավարությունը քաղաքական պատասխանատվություն կրի»:
Արփինե ՍԻՄՈՆՅԱՆ
ՅՀԴ = ՀՀԿ-ի կրտսեր եղբայրը: