2014 թվականի նոյեմբերի 26-ին, Հայոց ցեղասպանության 100-րդ տարելիցին նվիրված միջոցառումների շարքն ազդարարվեց Ախալքալաքի Սուրբ Խաչ եկեղեցում անցկացված հուշ-երեկոյով:
Երեկոն կազմակերպվել էր Ջավախքի ընդհանուր առաջնորդական փոխանորդ Տեր Բաբգէն վրդ Սալբիյանի նախաձեռնությամբ` Ախալքալաքի Սուրբ Խաչ եկեղեցու կիրակնօրյա դպրոցի, եկեղեցական երգչախմբի, Նինոծմինդայի «Ռաֆայել-Ջավախ» կրթամշակութային կենտրոնի հետ համատեղ:
Երեկոյին ներկա էին Ախալքալաքի և Նինոծմինդայի տեղական իշխանությունների ներկայացուցիչներ, հասարակական և մշակութային գործիչներ…
Ջավախքի փոխառաջնորդն իր ելույթում նշեց. «Մենք պարտավորություն ունենք մեր նախնիների հիշողության և ապագա սերնդի առջև: Մենք պետք է ուժեղ սերունդ ունենանք, հզոր միտք, անկոտրում պայքար, և հետևողական լինենք մեր գործողություններում: Այսօր այստեղ հավաքվել ենք ոչ թե սգալու, այլ կրկին վերահաստատելու մեր ԳՈՅՈՒԹՈՒՆՆ աշխարհում: Յուրանչյուրս մեր բաժին պայքարն ունենք, պայքար, որ մի օր անպայման հաղթանակ է ծնելու»:
Կարդացեք նաև
Հայր Սուրբի խոսքը շարունակեց Նինոծմինդայի «Ռաֆայել-Ջավախ» կրթամշակութային կենտրոնի տնօրեն Ժորա Սնխչյանը՝ անչափ կարևորելով նմանատիպ միջոցառումների կազմակերպումը:
Այնուհետև հնչեցին թեմատիկ բանաստեղծություններ ինչպես հայ դասականների հայտնի գործերից, այնպես էլ ջավախքցի բանաստեղծների ստեղծագործություններից, ինչին մերթընդմերթ համեմվում էին երգչախմբերի գեղեցիկ երաժշտական կատարումները:
Երեխաներն իրենց զգացմունքայնությամբ հուզեցին ներկաներին՝ կորզելով ուրախության արցունքներ:
Հուշ-երեկոն ամփոփեց 8-ամյա Դավիթ Հարությունյանը Գևորգ Էմինի «Պարեց հայն ու ողջ աշխարհը զարմացավ» բանաստեղծությամբ՝ ևս մեկ անգամ վերահաստատելով, որ ապրում է հայը, պարում է հայն ու կրկին ուրախ երգում…
Ջավախքի ընդհանուր առաջնորդական փոխանորդության մամլո դիվան
