«Ես շատ գոհ եմ, շատ ոգեւորված եմ, նամանավանդ, Գագիկ Ծառուկյանի հետ հանդիպումից հետո, որը ինձ շատ հույսեր ներշնչեց»,- այսօր՝ նոյեմբերի 27-ին, «Փաստարկ» մամլո ակումբում լրագրողների հետ հանդիպման ընթացքում հայտարարեց «Ժողովրդական» կուսակցության նախագահ Տիգրան Կարապետյանը:
Նա նշեց, որ ինքը եւ ինչպես նաեւ իր գլխավորած «Ժողովրդական» կուսակցությունը համարում է, որ համաժողովրդական շարժման առաջնորդը Գագիկ Ծառուկյանն է. «Չնայած՝ անձամբ ինքը՝ Գագիկ Ծառուկյանը, հայտարարում է, որ բոլորս հավասար ենք, բայց դա չի նշանակում, որ ժողովուրդը իր շուրջ համախմբված չէ, ես համարում եմ, որ այսօր իրականությունն այդպիսինն է, ինչքան էլ մեկն ուզի կամ չուզի»:
Պարոն Կարապետյանի կարծիքով՝ Համաժողովրդական շարժումը իրական ուժ է եւ նրան որեւէ մրցակից նա չի տեսնում՝ ո՛չ ներկա դրությամբ, ո՛չ էլ ապագայում: Տիգրան Կարապետյանի խոսքերով՝ եթե ժողովուրդը պատրաստ լիներ իշխանափոխության գործընթացին, ապա հանրահավաքները շարունակական կլինեին, սակայն ժողովուրդը մի հանրահավաքի ընթացքում մեծ քանակությամբ է գնում, իսկ մյուսին՝ ավելի քիչ:
Հարցին, թե հնարավո՞ր է, որ համաժողովրդական շարժմանը միանան խորհրդարանական կուսակցություններ, մասնավորապես՝ Հայ հեղափոխական դաշնակցություն եւ Օրինաց երկիր կուսակցությունները, Տիգրան Կարապետյանը պատասխանեց, որ այդպես չի կարծում. «Ե՛վ Օրինաց երկիրը, ե՛ւ դաշնակցությունը կապված են իշխանության հետ, համենայն դեպս՝ ժողովրդին վստահություն չեն ներշնչում»:
Կարդացեք նաև
Ամի ՉԻՉԱԿՅԱՆ
