էներգետիկայի եւ բնական պաշարների նախարար Երվանդ Զախարյանն այսօր «Նաիրիտ» գործարան կատարած այցի ժամանակ նշել է, որ այս ընթացքում գործարանի 178 աշխատակից ստացել է բավական բարձր աշխատավարձ՝ 400 հազարից մինչեւ 2 մլն 600 հազար դրամ, ինչը, նախարարի կարծիքով, բոլորովին արդարացված չէ ստեղծված իրավիճակում:
Aravot.am-ը «Նաիրիտ»-ի արհմիութենական կազմակերպության նախագահ Հրաչ Թադեւոսյանից հետաքրքրվեց, թե «Նաիրիտ»-ում բարձր աշխատավարձեր ստացողները կոնկրետ ովքե՞ր են եղել:
«Թե ով որքան աշխատավարձ է ստանում, մեզ մոտ փակ տեղեկատվություն է, բայց դրանք փոխտնօրեններն են, արտադրամասի պետերը, գլխավոր մասնագետներն ու ավելի վերեւ պաշտոններ զբաղեցնող անձինք»,-ասաց Հրաչ Թադեւոսյանը:
Նշենք, որ մամուլում, բազմաթիվ հրապարակումներ եղան, համաձայն որոնց, նախկին վարչապետ Տիգրան Սարգսյանի եղբայրը` Աշոտ Սարգսյանը, որը զբաղեցնում էր «Նաիրիտ»-ի կոմերցիոն գծով փոխտնօրենի պաշտոնը, նույնպես մի քանի միլիոն դրամ աշխատավարձ է ստացել:
Կարդացեք նաև
Ի տարբերություն Երվանդ Զախարյանի, Հրաչ Թադեւոսյանը չի գտնում, որ «Նաիրիտ»-ի` պարտքերի մեջ թաթախվելու պատճառներից մեկը եղել են բարձր աշխատավարձերը: Մեր զրուցակցի համոզմամբ, գործարանն այդքան պարտքեր է կուտակել, քանի որ կառավարության հետ կնքած պայմանագրի համաձայն սեփականատերը ժամանակին եւ խոստացված չափով չի կատարել ներդրումային պարտավորությունները:
«Այդ պատճառով գործարանը չի կարողացել բանկերից վերցրած վարկերի տոկոսները վճարել, սպառած հոսանքի, գազի համար վճարել եւ ընկել է պարտքերի մեջ»:
Այսօր Երվանդ Զախարյանը «Նաիրիտ»-ի աշխատակիցներին խոստացել է երկու աշխատավարձ վճարել` մեկը մոտ օրերս, մյուսն էլ դեկտեմբերին, չնայած, որ, ինչպես Հրաչ Թադեւոսյանն է ասում, կոլեկտիվի անունից խնդրել է, որ խոստացվածից բացի դեկտեմբերի մեջ եւս մեկ աշխատավարձ էլ վճարեն:
Լուսինե ԲՈՒԴԱՂՅԱՆ
