Այսօր Գյումրու քաղաքապետ Սամվել Բալասանյանը ԱԺ մարդու իրավունքների պաշտպանության և հանրային հարցերի մշակման հանձնաժողովի անդամների հետ հանդիպելիս, խոսք բացեց Գյումրին ազատ տնտեսական գոտի դարձնելու մասին: «Եթե 1999 թվականից իմ գործունեությունը հիշում եք, միայն մի խնդիր եմ առաջ քաշել. դառնալ ազատ տնտեսական գոտի: Ճիշտ է՝ «Ազատ տնտեսական գոտու մասին» օրենքը մենք ընդունեցինք, բայց դա շատ սահմանափակ է», -ասաց Սամվել Բալասանյանը: Ըստ նրա, եթե այդ օրենքը նորմալ գործեր, այնտեղ փոփոխություններ կատարվեին, Գյումրին կզարգանար և ոչ թե կարևոր նշանակություն ունեցող այս քաղաքը կանտեսվեր:
«Ինչի՞ համար Երևանը պիտի ունենա 71 միլիարդ դրամի բյուջե, որից 19 միլիարդը հավաքագրի, ասենք Գյումրին ինչի՞ պիտի դոտացիա ստանա 2 միլիարդ, տրամաբանությունը ո՞րն է: Եթե բնակչության թվաքանակով ես նայում, մենք տվել ենք 61 միլիոն, բա էդքա՞ն են մեզ տալիս: Մենք 100 հազար բնակչություն ունենք, գոնե 100 հազարին համապատասխան լինի գումարը», ասաց Գյումրու քաղաքապետը: ԱԺ պատգամավոր, ԲՀԿ-ական Էլինար Վարդանյանն էլ իր հերթին դժգոհեց, որ «Ֆինանսական համահարթեցման մասին օրենքի» նախագիծ են մշակել, որն ամեն անգամ հետ են դարձնում, ու արդյունքում ամեն ինչ կենտրոնանում է Երևանում: Քաղաքապետը նեղրսրտեց, որ մշակույթի, սպորտի նախարարությունները Գյումրի չեն տեղափոխում, և գլուխը մեծացնելով՝ չգիտես ուր են հասնում (ի նկատի ունի Երևան):
«Գյումրու անունը հաճախ տվեք Ազգային ժողովում, որովհետև Գյումրին մեր երկրի համար շատ կարևոր նշանակություն ունի, ես որ քաղաքապետ չէի, ճիշտն ասած էդ կարևորությունը էդքան չէի հասկանում, ինչ հիմա: Շատ-շատ կարևոր քաղաք է, պատահական չէ, որ էստեղ ռուսական զորք կա կանգնած՝ 1800 թվականից մինչև հիմա: Գյումրին պետք է ուժեղ լինի»,- ասաց Սամվել Բալասանյանը:
ԱԺ պատգամավոր Զարուհի Փոստանջյանն էլ Սամվել Բալասանյանից հետաքրքրվեց, թե Եվրասիական տնտեսական միության համաձայնագիրն արդյո՞ք Գյումրու քաղաքապետի հետ քննարկել են: Ըստ տիկին Փոստանջյանի, մի քանի օր առաջ եղել են լսումներ Ազգային ժողովում, և Շավարշ Քոչարյանը հայտարարել է, որ Իրանի ու Վրաստանի հետ մեր հարաբերությունները, արտոնությունները, որ ունեինք, կպահպանվեն. Հայաստանը բանակցել է, բայց այս պայմանագրի ներքո մենք այլևս չենք կարող ունենալ ազատ տնտեսական գոտիներ: Ըստ Զարուհի Փոստանջյանի, ռազմավարական նշանակություն ունեցող հարևանների հետ՝ Վրաստանի ու Իրանի հետ ազատ տնտեսական գոտի ունենալը հնարավորություն կտար Հայաստանի հյուսիսն ու հարավը զարգացնել: «Դուք այդ մասով, որ գոնե բանակցեիք, ճիշտ եք ասում ազատ տնտեսական գոտու առկայությունը Բավրայի հետ սահմանին, նաև Մեղրիում, մեր առաջարկն էր , որ երկու կետերում ունենայինք ազատ տնտեսական գոտիներ, գոնե այդ մասով վերապահումներ լինեին: Ես ինքս դեմ եմ այդ պայմանագրին, բայց գոնե վերապահումներ լինեին, որ ապագայում մենք մեզ չկաշկանդեիք»,- Գյումրու քաղաքապետին ասաց Զարուհի Փոստանջյանը: Սամվել Բալասանյանն էլ պատասխանեց, որ դեռ չի ծանոթացել պայմանագրին, կծանոթանա ու կբարձրացնի հարցը:
Կարդացեք նաև
Քաղաքապետի հետ հանդիպումից հետո Aravot.am-ը Զարուհի Փոստանջյանից հետաքրքրվեց, թե այս խնդիրները Շիրակի մարզից ընտրված պատգամավորները չե՞ն բարձրաձայնում ԱԺ-ում, որ իրենք են գալիս գյումրեցիների խնդիրները լսելու: Պատգամավորը թեև իրեն իրավունք չվերապահեց գնահատել Շիրակի մարզից ընտրված պատգամավորների աշխատանքը, սակայն նշեց, որ նրանք այնքան նախանձախնդիր պետք է լինեին, որ ԱԺ-ում մի քանի օր առաջ տեղի ունեցած լսումների ժամանակ Արտաքին գործերի փոխնախարարի առջև հարց բարձրացնեին, թե ե՞րբ է վերջիվերջո Գյումրին դառնալու ազատ տնտեսական գոտի:
Նունե ԱՐԵՎՇԱՏՅԱՆ
2 անժխտե՛լի փաստ կա. ա) ԵՏՄ-ն կործանելու է Հայաստանի տնտեսությունը, բ) քաղաք-պետություն Երևանը կործանում է մարզերը: Ուստի՝ նաև անկա՛խ տեղական բյուջեներ: