Թուրքագետ Հակոբ Չաքրյանի կանխատեսմամբ, Թուրքիայի խորհրդարանը մարդկության դեմ կատարված հանցագործությունների ճանաչման մասին օրինագիծը կմերժի:
«Բայց այն կմնա երկրի քաղաքական կյանքի օրակարգում»,- այսօր «Զարկերակ» ակումբում ասաց թուրքագետը:
Նա հիշեցրեց, որ 1990-ականներին «ցեղասպանություն» բառի միայն բարձրաձայնման համար Թուրքիայում խիստ պատժամիջոցներ էին սահմանված՝ դատում եւ կալանավորում էին, իսկ ցեղասպանության մասին հիմա բարձրաձայն խոսելը վկայում է Եվրամիության պահանջների ու դիրքորոշման խստացման մասին. «Օրինագծի հայտնվելը ոչ այնքան Ռեջեփ Թայիփ Էրդողանի արժանիքն է, որքան Եվրամիության, այսինքն՝ Էրդողանի հանդուրժողականությունը պայմանավորված է ԵՄ-ի պահանջներով: Սա լուրջ քայլ է. երկրի ներսում օրինականացվում է պատմության հետ երես առ երես կանգնելու պահանջը»:
Թուրքագետի խոսքով, օրինագիծը չի ընդգրկվի Թուրքիայի խորհրդարանի օրակարգ, բայց դրա քննարկումն արդեն իսկ առաջընթաց է:
Կարդացեք նաև
Այդ օրինագիծը խորհրդարան էր ներկայացրել քրդական Դեմոկրատական կուսակցության պատգամավոր Սեբաայթ Թունջելը: Օրինագծում կա դրույթ նաեւ ջարդերի ենթարկված ժողովուրդներից ներողություն խնդրելու վերաբերյալ:
Արփինե ՍԻՄՈՆՅԱՆ
