Ներգնա տուրիզմն այս տարի աճ է գրանցել: Այսօր լրագրողների հետ հանդիպմանը «Հայելի» ակումբում ասաց Հյուրանոցների ասոցիացիայի նախագահ Հակոբ Հակոբյանը: Նրա խոսքով՝ սա պայմանավորված է նրանով, որ այս տարի նոր հյուրանոցներ են բացվել, որի արդյունքում շրջանառության մեջ է մտել 550 նոր սենյակ, իսկ հաջորդ տարի կավելանա եւս 300-ը:
Հակոբ Հակոբյանի խոսքով՝ Երեւան քաղաքում հնարավոր է գտնել ցանկացած բյուջեի համար նախատեսված հյուրանոցային սենյակ՝ սկսած 15 հազարից մինչեւ 700 հազար դրամանոց նախագահական լյուքս:
Դրամի փոխարժեքի տատանումները, ըստ Հակոբ Հակոբյանի, չեն կարող իրենց անդրադարձը չունենալ հյուրանոցում գների բարձրացման վրա. «Եթե սննդամթերքը թանկանում է, ապա այդ թանկացումն անդրադառնում է նաեւ հյուրանոցում կատարված սննդամթերքի ծախսի վրա»:
Բանախոսը նաեւ նշեց, որ այս տարի թանկացավ էլեկտրաէներգիան, որը նույնպես իր անդրադարձն ունեցով հյուրանոցներում գների վրա:
Կարդացեք նաև
Խոսելով ամանորյա տոների համար նախատեսված հանգստի փաթեթներից՝ Հակոբ Հակոբյանը տեղեկացրեց, որ Հայաստանի տարածքում տոներն անցկացնելու համար միջին 4 հոգանոց ընտանիքը 5-6 օր հանգստանալու համար կծախսի ամենաքիչը 300 հազար դրամից մինչեւ 700 հազար դրամ:
Ասուլիսի մեկ այլ մասնակից ՝«Ջոել» տուրիստական գործակալության տնօրեն Սոնա Եղիազարյանն էլ նշեց, որ Ամանորին հայաստանցիները հիմնականում նախընտրում են հանգստանալ ծովափնյա երկրներում՝ Եգիպտոս, Արաբական Միացյալ Էմիրություններ, Թաիլանդ: Սոնա Եղիազարյանը նշեց, որ Ամանորին ծովափնյա երկրներում հանգստանալու համար մեկ անձը 700-800 դոլար պետք է ծախսի փաթեթը ձեռք բերելու համար:
Հայաստանի տուրօպերատորների ասոցիացիայի նախագահ Մարինա Կպրյանն էլ իր խոսքում ասաց, որ, իհարկե, Հայաստանում հանգիստն ավելի մատչելի է, քան ծովափնյա երկրներում, սակայն եթե հանել ավիատոմսի գինը, ապա ստացվում է, որ ընդհանրապես մատչելի չէ Հայաստանում հանգիստը. «Այստեղ հանգիստը սահմանափակ է»:
Էլյա ՀՈՎՀԱՆՆԻՍՅԱՆ
