Այսօր կառավարության նիստից հետո լրագրողներն էկոնոմիկայի նախարար Կարեն Ճշմարիտյանից հետաքրքրվեցին վերջին շրջանի թանկացումներից, ինչին ի պատասխան, Ճշմարիտյանը հիշեցրեց այսօր նիստին տնտեսական մրցակցության պաշտպանության պետական հանձնաժողովի նախագահ Արտակ Շաբոյանի ներկայացրած արդյունքները: «Ներկայացվեցին այն ապրանքների գծով թանկացումները, որոնք կամ համահունչ են կամ համահունչ չեն դրամի արժեզրկմանը, ուսումնասիրությունները շարունակում են, եւ ըստ հանձնաժողովի նախագահի, եթե չարաշահումներ լինեն, նրանք անպայման արձագանքելու են»,-ասաց Ճշմարիտյանը:
Լրագրողների դիտարկմանը, որ Եվրասիական տնտեսական միության (ԵՏՄ) անդամ երկրները` Ղազախստանն ու Բելառուսն արդեն տարաձայնություններ ունեն միության հետ, պարոն նախարարն ասաց, որ նման երեւույթներ լինում են ցանկացած միության մեջ, ցանկացած տնտեսական հարաբերություններում. «Որոշակի ժամանակ է անհրաժեշտ, որ որեւէ խնդիրներ լուծվեն, նույնպիսի խնդիրներ են ունեցել նաեւ այլ միությունները, տնտեսական տարածքները: Կարծում եմ, համաձայնություն կգտնեն, անհաշտությունը կվերանա, եւ չեմ կարծում դա լուրջ սկզբունքային խնդիր է»:
Դիտարկմանն էլ` ՌԴ արտաքին գործերի նախարար Սերգեյ Լավրովն ասել է, որ Արեւմուտքի դեմ պատժամիջոցներին պետք է միանան նաեւ ԵՏՄ երկրները, պարոն Ճշմարիտյանն ասաց, որ տեղյակ չէ այդ մասին:
Լրագրողների այն դիտարկմանն էլ, որ դրամի արժեզրկումը տնտեսության մեջ խնդիրներ է առաջացնում, նախարարն ասաց, որ, ընդհանուր առմամբ, մեր տնտեսության մեջ եթե հնարավոր լինի արտահանման ծավալները մեծացնել, որի շուրջ կառավարությունը լուրջ աշխատանքներ է իրականացնում, սա հնարավորություն կտա այս տեսակի տատանումներից խուսափել:
Կարդացեք նաև
Մանրամասն` տեսանյութում
«Մեր այսօրվա արտահանման կառուցվածքում դրական փոփոխություն կա, եթե արտահանման ճնշող մասը նախկինում ԱՊՀ եւ Եվրամիության երկրներն էին` 70%, այսօր 44% այլ երկրներ են: Սա լավ ցուցանիշ է արտահանման դիվերսիֆիկացիայում: Այս տարվա ներդրումները, մասնավորապես, ագրոբիզնեսում, շինանյութերի արդյունաբերությունում, ինֆորմացիոն տեխնոլոգիաներում, ինժեներիայի ոլորտում, մյուս տարի շատ ավելի դրական արդյունքներ են տալու»:
Նելլի ԲԱԲԱՅԱՆ
