Այսօր ԱԺ-ում լրագրողների հետ զրույցում ֆինանսների նախարար Գագիկ Խաչատրյանը որոշ բացատրություններ տվեց՝ երկրում փոխարժեքի տատանումներից ստեղծված իրավիճակի հետ կապված:
Լրագրողների դիտարկմանը, որ արդեն խանութներ են փակվում՝ Գագիկ Խաչատրյանը պատասխանեց. «Բնականաբար, կլինեն նման դեպքեր, որովհետեւ իրոք տնտեսության մեջ տնտեսվարողները հայտնվել են մի վիճակում, որ իրենց համար էլ է անհասկանալի: Հիմա պետք է կառավարությունը, ԿԲ-ն իր գործիքները կիրառի, որպեսզի կարողանանք կայունացնել վիճակը»:
Հարցին՝ հարկերը նվազեցնելու տարբերակը չի՞ քննարկվում՝ Գագիկ Խաչատրյանը պատասխանեց, որ՝ ոչ. «Որովհետեւ հարկերի նվազեցման խնդիր հիմա չի դրվում:Լ Ընդհանրապես ՀՆԱ-հարկեր հարաբերակցության շրջանակներում հարկային, մաքսային մարմինը իր գործն անում է: Մենք հակված չենք կոշտ հարկաբյուջետային քաղաքականության, այլ մեղմ, տնտեսությունը աշխուժացնող, մինչեւ կայունացնենք վիճակը»:
Գագիկ Խաչատրյանը վստահեցրեց, որ այս պահին ԿԲ-ն իր լիազորությունների շրջանակներում հնարավոր ամեն ինչ անում է՝ իրավիճակը կայունացնելու. «Խոստումները, որ ԿԲ-ն ներկայացնում է կառավարությանը, հուսադրող են»:
Կարդացեք նաև
Հարցին, երբ ասում են իրավիճակը կկայունանա, ի՞նչ է դա նշանակում, այսպես կմնա, չի՞ իջնի՝ նա պատասխանեց. «Պետք է ԿԲ-ի դրամավարկային քաղաքականությունը լինի հուսադրող՝ երկարատեւ հատվածի համար: Մենք կարող ենք գործողություններ անել՝ կոնկրետ այս իրավիճակը կայունացնելու: Բայց մենք հակված ենք երկարատեւ հատվածի համար կայունացնելու վիճակը, որ տնտեսվարողները դրամ, դոլար, եվրո հարաբերությունները հստակ տիրապետեն, թե ինչ է կատարվում: Շատ դեպքերում ինքը բարդ իրավիճակ է, ոչ շահեկան, նաեւ մասնագետների համար ն անորոշությունները շատ»:
Հարցին՝ տոները մոտենում են եւ 12 օր հանգիստ է, այսինքն, մինչ այդ պետք է կառավարությունն անի իր անելիքները, կհաջողվի՞՝ նա պատասխանեց՝ «Արվում է: Հենց հիմա վարչապետի մոտ քննարկումներ են գնում միջազգային կառույցների, մասնագետների: Բոլոր քայլերը կարվեն, որպեսզի վիճակը կայունանա»:
Գագիկ Խաչատրյանն ասաց, որ հիմա ներկրողներն էլ ունեն ռիսկ, արտահանողներն էլ ունեն. «Արտահանողների համար ոչ ցանկալի իրավիճակ է: Հիմնական կոմպոնենտը ՌԴ-ում տեղի ունեցող իրավիճակն է»:
Հարցին՝ փոխարժեքի տատանումը համահո՞ւնչ է այսօրվա մեծ գնաճին՝ նա պատասխանեց, որ դա մասնագետների համար էլ է շատ դժվար գնահատելը: Պետք է հասկանան, թե պատճառները որոնք են: Նա նշեց, որ բյուջեի հետ կապված էլ խնդիրներ կան՝ տնտեսական աճի հետ կապված:
Հռիփսիմե ՋԵԲԵՋՅԱՆ
