Քիչ առաջ ԱԺ դռնփակ արտահերթ նիստից դուրս եկավ ՀՀԿ պատգամավոր, ԱԺ տնտեսական հարցերի մշտական հանձնաժողովի նախագահ Վարդան Այվազանը: Նա ասաց, որ լսում են կառավարության ներկայացուցիչներին, ԿԲ-ին, որպեսզի հասկանան նախ պատճառները, թե ինչու է ստեղծվել այս վիճակը:
Հիշեցնենք, որ դրամի արժեզրկման հետ կապված այսօր բոլոր խմբակցությունների մասնակցությամբ ԱԺ արտահերթ նիստ է հրավիրվել, որն անցկացվում է դռնփակ:
Վարդան Այվազյանի խոսքերով՝ «Բանկային հաշիվներ ունեցող քաղաքացիների դրամական փոխանցումների հետ կապված որեւէ սահմանափակում չկա: Դոլար դրամային արտարժութային շուկայում տեղի է ունենում որոշակի խուճապային իրավիճակ: Համենայնդեպս ինքը նորից իջնելու է, պարզապես հարց է, թե ինչ գործիքակազմ է կիրառվելու»:
Հարցին՝ որքա՞ն կիջնի՝ նա հեգնեց, թե Դուք ժամանակահատվածն ասեք, ես էլ ենթադրություն անեմ. «Դա ենթադրությունների ոլորտից է, որովհետեւ կախված է հազարավոր գործոններից»:
Կարդացեք նաև
Հարցին՝ միակ պատասխանատուն Կենտրոնական բա՞նկն է՝ Վարդան Այվազյանը պատասխանեց. «Ոչ: ԿԲ-ն պատասխանատու է ֆինանսական ոլորտում, իսկ շուկայի կարգավորման ոլորտում միայն ԿԲ-ն չի կայունացման հետ կապված: Այդտեղ շատ գործոններ կան՝ տնտեսական մրցակցություն, շատ գործոններ կան»:
Հարցին՝ ինչո՞ւ մինչ այս այդ գործիքները չկիրառվեցին, եւ հիմա նոր մտծում են, թե ինչ գործիքներ կիրառեն՝ Վարդան Այվազյանը պատասխանեց. «Իսկ ինչի? է համաշխարհային շուկայում տեղի ունենում այսպիսի պրոցեսներ: Ինչո՞ւ է Հնդկաստանում, օրինակ, գումարն իջել: Այ, եթե դուք գոնե ինձ ասեք, թե Ինդոնեզիայում ինչի է իջել, ես ձեզ կպատասխանեմ»:
Դիտարկմանը, որ այլ երկրներում այսքան չի իջել՝ նա չհամաձայնեց. «Ես գիտեմ, որ մեր կողքի հարեւան երկրում 1.75 էր, թռավ հասավ 1.98, թռավ հասավ 2.22: Սա՝ լարիի հետ կապված: Հետո իջավ 2 լարի»:
Մեր հարցին, որ Գյումրիում արդեն մարդիկ սկսել են դոլարով վաճառել իրենց ապրանքը՝ նա պատասխանեց, որ դրա իրավունքը չունեն. «Այսօր կարող է սկսեն դոլարով վաճառեն, կարող է 3 անգամ գին բարձրացնեն: Կարգավորման խնդիրներ կան»:
Հռիփսիմե ՋԵԲԵՋՅԱՆ
