Մեղրու տարածաշրջանի Կուրիս գյուղում կրկին վերընտրվել է գործող գյուղապետ, ՀՀԿ-ից առաջադրված Սուրիկ Գրիգորյանը: 18 տարի շարունակ համայնքը ղեկավարող Սուրիկ Գրիգորյանի օգտին ոչ ոք դեմ չէր քվեարկել, իսկ 45 ընտրողից քվեարկությանը մասնակցել էր 31 բնակիչ: Ներկայիս գյուղապետն այս ընտրություններին մասնակցում էր առանց մրցակցի, քանի որ գյուղապետի պաշտոնի համար առաջադրված անկուսակցական Վարդան Գալստյանը մինչեւ վերջ չմասնակցեց ընտրապայքարին եւ ընտրություններից առաջ ինքնաբացարկ հայտնեց:
Գործող գյուղապետ Սուրիկ Գրիգորյանն ավելի վաղ փոխանցել էր, որ անցած տարիներին էլ գյուղապետի պաշտոնի համար պայքարել ցանկացողներ չեն եղել, եւ ոչ մի անգամ մրցակից չի ունեցել: Ասում է` գյուղապետ ընտրվելուց հետո ամենագլխավոր խնդիրը պետք է գյուղի վերաբնակեցումն ու պայմանների բարելավումը լինի: «Գյուղից երիտասարդ ընտանիքները թողել-գնացել են, հիմնականում մանկապարտեզի բացակայության ու այլ պատճառներով: Համայնքի ավելացած բյուջեով արդեն հնարավոր կլինի պայմանները բարելավել համայնքում: Մեր գյուղի վարչական տարածքում է գտնվում Ագարակի կոմբինատի բաց հանքը, նոր օրենքի համաձայն` կոմբինատն արդեն պետք է համայնքին ավելի շատ գումար վճարվի, որն էլ կուղղվի մեր գյուղի զարգացմանը», -ասաց Մեղրու տարածաշրջանի Կուրիս գյուղի երկարամյա գյուղապետը:
Մերի ՍՈՂՈՄՈՆՅԱՆ
