«Լրագրողներ առանց սահմանների» իրավապաշտպան կազմակերպությունը հրապարակել է զեկույց, որն արտացոլում է այն պատկերը, թե 2014 թվականի ընթացքում իրենց մասնագիտական պարտականությունները կատարելու համար քանի ԶԼՄ ներկայացուցիչ է զոհվել: Զեկույցի համաձայն` 66 հոգի զոհ է դարձել ընտրած մասնագիտության պատճառով: Նաեւ նշվում է, որ զոհված լրագրողների թիվն ավելի է մեծանում, երբ ուսումնասիրում ենք վերջին տասը տարիների պատկերը: Տասը տարում աշխարհում մասնագիտական պարտականությունների համար զոհ է դարձել 720 ԶԼՄ ներկայացուցիչ:
Զեկույցում կազմակերպության ուշադրությանն են արժանացել այն երկրները, որոնք ամենավտանգավորն են ԶԼՄ ներկայացուցիչների համար: Պարզվում է, արդեն երկրորդ տարին է` որպես ամենավտանգավոր երկիր է համարվում Սիրիան, որտեղ զոհվել է 15 հոգի, 7-ը` մերձավորարեւելյան հակամարտության լուսաբանման ժամանակ, 6 լրագրող սպանվել է Ուկրաինայում, 4 -ը` Իրաքում, 4 -ը` Լիբիայում: Ինչ վերաբերում է առեւանգված լրագրողների թվին, ապա կազմակերպությունը նշում է շուրջ 119 հոգու, որոնք առեւանգվել են այս տարվա ընթացքում: Առեւանգվածների թիվը, նախորդ տարվա համեմատ, աճել է 35%-ով: Իսկ պատանդության մեջ գտնվող լրագրողների թիվն այս պահի դրությամբ` 40-ն է:
Զեկույցում նշվում է, որ առեւանգված լրագրողների թվաքանակով առաջին տեղում է գտնվում Ուկրաինան, հենց այստեղ է, որ անհետ կորել է 33 ԶԼՄ աշխատակից: Երկրորդ տեղում է Լիբիան, որտեղ էլ անհետ կորածների թիվը 29-ն է, երրորդ տեղում Սիրիան է՝ 27 հոգի, ապա Իրաքը` 20 հոգի: Զեկույցից պարզ է դառնում, որ առեւանգված լրագրողների թիվը, նախորդ տարվա համեմատ, աճել է 37%-ով:
Զեկույցում անդրադարձ կա նաեւ աշխարհում ազատազրկման ենթարկված լրագրողների թվին, որն էլ հասնում է 178-ի: Իսկ այն երկրները, որտեղ ազատազրկված են ԶԼՄ ներկայացուցիչները, հետեւյալն են` Չինաստան` 29 հոգի, Էրիթրեա` 28, Իրան՝ 19-ը, Եգիպտոս` 16 եւ Սիրիա` 13 հոգի:
Կարդացեք նաև
Հիշեցնենք, որ «Լրագրողներ առանց սահմանների» կազմակերպությունն ամիսներ առաջ մտահոգվել էր նաեւ Հայաստանով, մեր խորհրդարանում քննարկվող, Քաղաքացիական օրենսգրքի 1087.1 հոդվածում փոփոխություններ ենթադրող օրինագծով: Ըստ այդ օրինագծի՝ լրատվամիջոցները պետք է պատասխանատվություն կրեն իրենց կայքերում տեղադրված մեկնաբանությունների, ինչպես նաեւ համացանցի այլ էջերից վերարտադրած բովանդակության համար։
Կազմակերպությունն իր կայքում անդրադառնալով մեր երկրին՝ նշել էր, որ Հայաստանը 180 երկրի մեջ 78-րդն է 2014 թվականի մամուլի ազատության վարկանիշային աղյուսակում, եւ զգուշացրել, որ օրինագծի ընդունումը բացասաբար կազդի 2015 թվականի աղյուսակում Հայաստանի դիրքի վրա։
Պատրաստեց
ԵՎԱ ՀԱԿՈԲՅԱՆԸ
«Առավոտ» օրաթերթ
17.12.2014
