Այսօր կառավարության նիստի սկզբում ՀՀ վարչապետ Հովիկ Աբրահամյանը անդրադարձավ ֆինանսական շուկայում տիրող իրավիճակին, ասելով, որ կառավարությունը անհիմն թանկացումներ չի հանդուրժի:
Վարչապետի տեղեկացմամբ՝ երեկ հանդիպել է Արժույթի միջազգային հիմնադրամի եւ Համաշխարհային բանկի մասնագետներին եւ մի խումբ տնտեսվարողների հետ: Նրա խոսքերով՝ մեր միջազգային գործընկերները աջակցում են արտաքին շոկերով պայմանավորված փոխարժեքի սուր տատանումների իրավիճակում:
«Երեկ երեկոյան եւ այսօր ֆինանսական շուկայում արդեն կայունացում է նկատվում, բայց կառավարությունը անհանգստացած է սպառողական շուկայում տեղի ունեցող որոշ գործընթացներով եւ փոխանակման կետերում գնման եւ վաճառքի մեծ մարժաներով: Երեկ ալյուրի, շաքարի եւ լայն սպառման մի շարք ապրանքների գծով ակնհայտ բարձրացումներ կային»,- ասաց Հովիկ Աբրահամյանը:
Վարչապետը Տնտեսական մրցակցության պաշտպանության պետական հանձնաժողովի նախագահ Արտակ Շաբոյանին հանձնարարեց ամենօրյա կտրվածքով ուսումնասիրություններ կատարել եւ իրեն տեղյակ պահել: «Հորդորում եմ ձեզ ամենայն խստությամբ մոտենալ այս չարաշահումներին»,- Շաբոյանին ասաց վարչապետը:
Կարդացեք նաև
Հովիկ Աբրահամյանը նաեւ հանձնարարեց դեղերի շուկան ստուգել եւ իրեն տեղեկատվություն տալ:
Լուսինե ԲՈՒԴԱՂՅԱՆ
