«Պուտինը ոչ թե մոռացավ, կամ չուզեց ասել, այլ պարզապես այդ պահին ու այդ ժամանակ չկարևորեց դա: Չեմ կարծում, որ նորմալ է դրանից եզրակացնել, թե մեր հանդեպ վերաբերմունք է փոխվել և մենք դաշնակիցներ չենք»,-այսօր «Հայելի» ակումբում լրագրողների հետ հանդիպմանը պատասխանելով հարցին, թե ինչո՞ւ իր ասուլիսի ընթացքում ՌԴ նախագահ Վլադիմիր Պուտինը չանդրադարձավ ՀՀ-ում տեղակայված ռուսական ռազմաբազային, այսպիսի կարծիք հայտնեց ՀՀԿ խմբակցության պատգամավոր Կարինե Աճեմյանը:
Այս առիթով ՀՀԿ-ական գործընկերոջը հակադարձեց «Ժառանգություն» խմբակցության պատգամավոր Թևան Պողոսյանը. «Եթե մարդ ընկալում է, որ տվյալ երկիրը նրա ռազմավարական գործընկերն է, առաջինը հենց նրան է հիշում, ուստի Պուտինը կարող էր կարևորության իմաստով հիշեցնել, որ ռազմաբազան հենց ՀՀ-ում է: Իսկ եթե չի ասել, գուցե ունի նաև այլ խնդիրներ: Գուցե լավ է, որ չի հիշել, դա ավելի լա՞վ է մեզ համար, քանի որ երբ Ռուսաստանը մեզ հիշում է, երբեմն դա դրական հետևանքներ չի ունենում: Արդյոք մեր շահերի՞ց է բխում, որ ՌԴ միակ գլխացավանքը լինի Հայաստանը: Մեր մտածողությունը պիտի փոխվի ու սկսենք առաջնորդվել մեր շահերով ոչ թե նրանով, թե Պուտինն ինչ է ասել»:
Վլադիմիր Պուտինի ասուլիսի հետ կապված մյուս մտահոգությունն այն է, որ Պուտինը հատուկ շեշտել է ՌԴ-Թուրքիա գործընկերային հարաբերությունը: Այս առիթով ՀՀԿ-ական պատգամավորն իր զարմանքը հայտնեց. «Զարմացա այդ հանգամանքի պարզունակ մեկնաբանություններից: Քաղաքականության մեջ դիտարկել, որ մեր դաշնակիցը այլ երկրի հետ չպետք է շփվի, կառուցի հարաբերություններ, դա սխալ մոտեցում է: Նաև մեր շահը պաշտպանել ռուս-թուրքական հարաբերություններում»:
Թևան Պողոսյանը կողմնակից է այս հարցում կարողանալ այնպես անել, որ ռուս-թուրքական հարաբերություններում կարողանանք մեր շահը պաշտպանել և դա օգնի մեզ ու բարենպաստ ելք ունենա մեզ համար: Նա մասնավորապես ասաց. «Մեր խնդիրները պիտի բխեն նրանից, թե ինչ դերակատարություն պիտի վերցնենք, որ այդ հարաբերություններից չտուժենք, այլ ռուս-թուրքական հարաբերությունները դրական զարգացումների մեջ կարողանան մեզ համար շահեկան լինել: Օրինակ՝ ՌԴ-ն Թուրքիայում պիտի ատոմակայան կառուցի, ինչո՞ւ չենք պահանջում, որ այդ ատոմակայանի ինչ-ինչ խնդիրներ հայկական կողմը կատարի և ստանա դերակատարություն»:
Կարդացեք նաև
Տաթև ՀԱՐՈՒԹՅՈՒՆՅԱՆ
