Լեռնային Ղարաբաղը չի միանա Եվրասիական տնտեսական միությանը Հայաստանի անդամակցությունից հետո, հայտնել է Բելառուսի փոխարտգործնախարար Ալեքսանդր Միխնևիչը՝ խորհրդարանին ներկայացնելով Հայաստանի ԵՏՄ անդամակցության պայմանագիրը՝ վավերացնելու համար, հաղորդում է «Բելտա»-ն:
«Մենք անհանգստացած էինք, որ այն տարածքները, որոնք չեն մտնում Հայաստանի կազմի մեջ, կարող էին հայտնվել Մաքսային միությունում: Հայկական կողմն ըմբռնումով մոտեցավ այդ պահանջին, այդ ցանկությանը: Համաձայնագրի մեջ նշում էր ներառված այն մասին, որ Լեռնային Ղարաբաղը Հայաստանի Հանրապետության մաս չէ: Հայկական կողմը բանավոր պաշտոնական հայտարարություն է արել», – ասել է Միխնևիչը՝ ավելացնելով, որ չկա որևէ խոչընդոտ, որը կխանգարի Հայաստանին դե ֆակտո դարձնել Մաքսային միության, իսկ հետագայում՝ Եվրասիական միության անդամ:
Դիվանագետը նաև հայտնել է, որ մինչև անդամակցության համաձայնագրի ստորագրումը Հայաստանը շատ մեծ աշխատանք է կատարել՝ իր օրենսդրությունը համապատասխանեցնելով այն նորմերին, որոնք վարում էին Ղազախստանը, Ռուսաստանը և Բելառուսը:
Պատրաստեց Հովհաննես ԻՇԽԱՆՅԱՆԸ
