Ինչպես արդեն տեղեկացրել էինք` այս գիշեր ժամը 03.02-ին Հայաստան-Ադրբեջան սահմանային գոտում տեղի է ունեցել 3.9 մագնիտուդով երկրաշարժ, որի ուժգնությունն էպիկենտրոնում կազմել է 4-5 բալ: Երկրաշարժը զգացվել է նաեւ Սյունիքի մարզում` Քաջարանում 5 բալ ուժգնությամբ, Կապան եւ Սիսիան քաղաքներում` 3-4 բալ: Երկրաշարժի ուժգնությունը զգացել են նաեւ Գորիս քաղաքի բնակիչները: «Ես ցնցումից վեր թռա քնից, շատ ուժեղ էր, երեւի մոտ 4 բալ կլիներ, բայց դուրս չեկանք տնից էդ ժամին, ցուրտ էր, մնացինք տանը», -ասաց Գորիսի բնակիչ Արմանը:
Քաջարանի քաղաքապետ Վարդան Գեւորգյանի խոսքով` Քաջարանում ո’չ ավերածություն կա, ո’չ խուճապ: «Շատերը քնած են եղել, եւ միայն արթուն բնակիչներն են զգացել երկրաշարժը, բայց խուճապի չեն մատնվել: Մեզ համար սովորական երեւույթ է, արտառոց ոչինչ չկա»,- նշեց Քաջարանի քաղաքապետը:
«Սեյսմիկ պաշտպանության հարավային ծառայություն» ՊՈԱԿ-ի գործադիր տնօրեն Ստեփան Բաղդասարյանի փոխանցմամբ` երկրաշարժին մոտ 15 րոպե անց հաջորդել 3.3 մագնիտուդ ուժգնությամբ հետցնցում: Այն Քաջարանում զգացվել է 4 բալ ուժգնությամբ, Կապան և Սիսիան քաղաքներում` 2-3 բալ ուժգնությամբ: «Արտառոց բան չկա, մեր տարածաշրջանին բնորոշ է: Խուճապ չի եղել, բայց մարդիկ մինչեւ գիշերվա 4-4.30 ահազանգել են մեր ծառայություն, մենք ասել ենք, որ էներգիան մարում է ու խուճապի մատնվելու կարիք չկա: Այս տարվա ընթացքում առաջին դեպքն էր, որ մարզում երկրաշարժ էր զգացվել, հունվարի 7-ին երկրաշարժ էր եղել նաեւ Նախիջեւան-ԼՂՀ սահմանային գոտում, բայց մարզի տարածքում չի զգացվել, մեր սարքավորումներն են միայն գրանցել», – ասաց պարոն Բաղդասարյանը:
Մերի ՍՈՂՈՄՈՆՅԱՆ
Հայկական մամուլում ինչու՞ են օգտագործում «մագնիտուդ» և՛ «բալ» բառերը: Սա շփոթեցնող է: Ի՞նչ է կոնկրետ նշանակում «բալ»: Պիտի միայն օգտագործել միջազգայնորեն ընդունված «մագնիտուդը» (Richter magnitude scale):