«Այն, ինչ կատարվեց Գյումրիում, պետք է մեր ղեկավարության համար դաս լինի, որ կարողանան վերահսկել բոլոր նրանց, որոնք զենք կրելու իրավունք ունեն»,- այսօր լրագրողների հետ հանդիպման ժամանակ այսպիսի տեսակետ արտահայտեց Քայքայիչ պաշտամունքներից տուժածների օգնության և վերականգնողական կենտրոնի ղեկավար Ալեքսանդր Ամարյանը:
Նա անդրադարձավ Գյումրիում կատարված հանցագործության մեջ մեղադրվող Վալերի Պերմյակովի ծնողներին, որոնք, Ա. Ամարյանի տեղեկություններով, «Հույս, հավատ, սեր» խարիզմատիկ եկեղեցու հովիվներ են: «Եկեղեցու վերադասը Չիտայում գտնվող «Փրկությունը Հիսուսի մեջ է» եկեղեցին է: Որպես եկեղեցի՝ հունվարի 3-23-ը պահք են պահում: Եկեղեցու ղեկավարման մեխանիզմը G12 է կոչվում: Նրա հետևորդները 12-ի հետ կապված որոշակի գաղափարներ ունեն»,- ասում է Ա. Ամարյանը:
Ի՞նչ դեր ունի այս հանգամանքը կատարվածում:
Քայքայիչ պաշտամունքներից տուժածների օգնության և վերականգնողական կենտրոնի ղեկավարը չի բացառում, որ կրոնական են եղել սպանության շարժառիթները. «Հայաստանում գործող ռուսական կառույցներն իմ աչքի լույսը չեն: Բայց հանցագործությանը հաջորդած տրամադրությունները միայն հակառուսական են, իսկ հակակրոնական տրամադրություններ բոլորովին չկան, բայց չէ՞ որ նա նաև եկեղեցու անդամ է»,- ասում է Ա. Ամարյանը:
Կարդացեք նաև
Ըստ նրա՝ խարիզմատիկ եկեղեցու հետևորդները, երկար ժամանակ լինելով եկեղեցու մեջ, կարող են հոգեկան շեղումներ ստանալ ու կատարել նույնիսկ այնպիսի ոճրագործություն, ինչպիսին կատարվեց Գյումրիում:
«Պետք է լինեն համապատասխան մասնագետներ, որոնք կկարողանան ճիշտ որոշել, թե ինչ շարժառիթով է կատարվել սպանությունը: Եթե ապացուցվի, որ հոգեկան շեղումներ է ունեցել, հնարավոր է՝ դատապարտվեն նաև այն կրոնական կառույցի ղեկավարները, որոնք այդ վիճակին են հասցրել նրան»,- ասում է Ա. Ամարյանը:
Սիրանուշ ՀԱՅՐԱՊԵՏՅԱՆ
