Հայաստանը շարունակելու է համատեղ ջանքերով ընդլայնել և ամրապնդել Ռուսաստանի հետ դաշնակցային, ռազմավարական հարաբերությունները՝ չնայած Գյումրիի ողբերգությանը, երեքշաբթի Բրյուսելում հայտարարել է Հայաստանի արտգործնախարար Էդվարդ Նալբանդյանը:
Եվրասիական տնտեսական միությանը անդամակցելուց հետո սա Հայաստանի և Եվրամիության համագործակցության խորհրդի առաջին նիստն էր, որի ընթացքում պաշտոնական Բրյուսելը, ըստ էության, չի բացառել, որ հնարավոր է՝ առաջիկայում Երևանի հետ ստորագրվի Ասոցացման համաձայնագիրը՝ առանց ազատ առևտրի բաղադրիչի: Այդ մասին նիստից հետո ասել է Եվրամիության Հարևանության և ընդարձակման հարցերով հանձնակատար Յոհանես Հանը՝ ընդգծելով, որ կողմերն այժմ հենց այդ հարցի շուրջ են բանակցում: «Կարծում եմ՝ մենք պետք է առավելագույնը քաղենք արդեն գոյություն ունեցող և բանակցված Ասոցացման համաձայնագրից: Անշո՛ւշտ, այն պետք է ճշգրտվի և արտացոլի Հայաստանի ստանձնած նոր պարտավորությունները, սակայն ես հույս ունեմ, որ այդ փաստաթղթի քաղաքական մասը կպահպանվի»,- «Ազատության» հարցին ի պատասխան ասել է Հանը:
Եվրամիությունն այժմ նախագահող երկրի՝ Լատվիայի արտգործնախարար Էդգարս Ռինկևիչն էլ իր հերթին նշել է, որ այդ առումով այս տարին շատ կարևոր է վճռական է Հայաստանի և Եվրամիության համար։ «Հստակ հանձնառություն կա շարունակելու մեր հարաբերությունները այն ոլորտներում, որտեղ հնարավոր է, հաշվի առնելով Հայաստանի ստանձնած պարտավորությունները ԵՏՄ-ի առջև»,- ընդգծել է Ռինկևիչը։
Հրապարակումն ամբողջությամբ կարող եք կարդալ` «Ազատություն» ռ/կ-ի կայքում:
