«Մեր պաշտոնյաները հենց իշխանությունը թողնում են, սկսում են միանգամից տեսնել ճգնաժամային վիճակը»,- Հայաստանի երկրորդ նախագահ Ռոբերտ Քոչարյանի այսօր հրապարակված հարցազրույցին այսպես արձագանքեց «Ժառանգություն» կուսակցության փոխնախագահ Արմեն Մարտիրոսյանը:
Գյումրիում հունվարի 12-ին Ավետիսյանների ընտանիքի սպանության վերաբերյալ Ռոբերտ Քոչարյանի դիտարկումների հետ Արմեն Մարտիրոսյանը համաձայնեց: Ըստ նրա այդ գնահատականները տեղին էին, բայց ոչ ամբողջական. «Մեր իշխանությունները աթոռի համար իրենց բոլոր լիազորությունները նվիրել են ռուսական իշխանություններին ու Գյումրու դեպքով սպասում էին ռուսական իշխանությունների արձագանքին: Երբ ժողովրդի ցասումից հետո Պուտինի զանգեց, հետո հիշեցին, որ նման իրադարձություններ են եղել: Մինչեւ Պուտինի զանգը որեւէ քայլ չեն արել, հետահայաց ասում են, թե խորհրդակցության ժամանակ Պուտինը ցավակցել էր, բայց ո՞ւմ է ցավակցել առողջապահությա՞ն, տրանսպորտի՞, թե՞ սպորտի հարցերով նախարարին: Ցավակցությունը հստակ ունենում է ընթացակարգ, դա պետք է պատշաճ կարգով լինի: Ռոբերտ Քոչարյանի գնահատականները իրականության մի մասին են անդրադառնում: Խնդիրը ռուսական կողմի պահվածքն է, միջպետական պայմանագրերի չկատարումը: Ոչ ամբողջական գնահատական է, բայց ինչ-որ ասվել է, իրականության մեջ կա»:
Անդրադառնալով 2-րդ նախագահի՝ արմատական փոփոխությունների անհրաժեշտության վերաբերյալ դիտարկումներին, պարոն Մարտիրոսյանը շարունակեց. «Արմատական փոփոխությունը տարբեր մեկնաբանություններ կարող է ունենալ, հենց ինքը պետք է պարզաբանի՝ ինչ նկատի ունի: Որ հասարակությունը չի ընդունում իշխանությանը, դա ակնհայտ է, որովհետեւ եթե 2013-ին Սերժ Սարգսյանը մի քսան տոկոս ձայն ուներ, արդեն դրա կեսն էլ չի մնացել: Այդ արմատական փոփոխությունները իսկապես անհրաժեշտ են ու ընդդիմադիր դաշտի ներկայացուցիչները պարբերաբար դրա մասին խոսել են:
Բայց այս մասով էլ Ռոբերտ Քոչարյանի դիտարկումները կիսատ են, ոչ ամբողջական: Նախ` պետք է բարձրաձայներ արտահերթ ընտրությունների խնդիրը ու արդյո՞ք չպետք է ինքն ասեր՝ ես էլ եմ մեղավոր, իմ նախագահության ժամանակ թույլ տվեցի «մարտի 1» լինի ու հենց քաղաքական մենաշնորհը խորացրի: Իմ կառավարման տասը տարվա ընթացքում խորացրի տնտեսական մենաշնորհները: Իհարկե, այս ամենի պատճառը կեղծված ընտրություններն են, իշխանական համակարգի ոչ լեգիտիմ ձեւավորումը, որ սկիզբ դրվեց 1991 թվականից հետո: Պարզ է, որ ամեն մեկն իր իշխանության տարիներին կոպտագույն սխալներ է արել, որ երկիրը բերել է այս վիճակին»:
Կարդացեք նաև
Արփինե ՍԻՄՈՆՅԱՆ
Ս.Սարգսյանը Ռ.Քոչարյանի կողմից առաջ մղված հետնորդն է եւ հետեվորդը,այնպես որ՝ այս շիլան եփել էն միասին ։ Սա Ռ.Ք-ի կողմից՝ ձեռքերը լվանալու փորձ է ընդհամենը։