Հոկտեմբերի 27-ի գործով ցմահ ազատազրկման դատապարտված Էդուարդ Գրիգորյանը 2014 թվականից facebook սոցիալական կայքի ակտիվ օգտատեր է: Նա նույնիսկ հոկտեմբերի 27-ի գործով իր հոդվածներն ու «բացահայտումներն է» տարածում:
Քրեակատարողական հիմնարկի մամուլի պատասխանատու Գոռ Ղլեչյանից Aravot.am-ը հետաքրքրվեց՝ տեղյա՞կ են Էդուարդ Գրիգորյանի սոցցանցերի ակտիվությունից եւ արդյոք ցմահ ազատազրկման դատապարտվածներին թույլատրվո՞ւմ է սոցցանցերից օգտվելը:
«Դա միջնորդավորված է, ինքը իր իրավունքներից օգտվելով, իրավունք ունի Սահմանադրությամբ վերապահված օգտվել իր իրավունքից, այդ թվում հեռախոսազրույցներ ունենալ ու նամակագրական կապ ունենալ: Ինքը կարող է իր մտքերը նամակով փոխանցել որեւէ մեկին, որը կարող է իր անունից սոցիալական կայքում էջ բացել ու տեղադրել իր մտքերը»,- պատասխանեց Գոռ Ղլեչյանը:
Բայց ամեն ինչ չէ, որ թեկուզ միջնորդավորված, բայց կարող է հայտնվել Էդուարդ Գրիգորյանի էջում, որովհետեւ, ըստ Գոռ Ղլեչյանի, այդ էջը վերահսկվում է. «Մենք միշտ նայում ենք, հետաքրքրվում ենք ու այդ պահը միշտ էլ վերահսկողության տակ ենք պահում»:
Կարդացեք նաև
Պարոն Ղլեչյանը վստահեցրեց, որ Էդուարդ Գրիգորյանի մոտ չկան այն տեխնիկական հնարավորությունները, որով կարողանար անձամբ վարել սեփական էջը:
Արփինե ՍԻՄՈՆՅԱՆ
