ՀՀ եւ ԼՂՀ ազգային հերոս, սպարապետ Վազգեն Սարգսյանի անվան զորամասն այսօր իր դռներն էր բացել նաեւ զորամասին հարակից համայնքների բնակիչների համար: Այստեղ մեծամասնություն էին կազմում հատկապես դպրոցների աշակերտները: Բանակի օրվա միջոցառումների շարքը այս զորամասը սկսեց զորահանդեսով, որի ընթացքում եղան պարգեւատրումներ եւ խրախուսանքներ:
Զորահանդեսին հաջորդեց զորամասի Մշակույթի տանը կազմակերպված համերգային միջոցառումը, որը կայացել էր այստեղի անձնակազմի եւ Արարատի թիվ 5 միջնակարգ դպրոցի համատեղ ջանքերով: Բանակում ծառայող զինվորները դպրոցում սովորող աշակերտների հետ ներկայացրեցին համերգային եւ պարային համարներ՝ օրվա խորհրդին համապատասխան:
Այնուհետեւ դպրոցներից աշակերտները հնարավորություն ստացան պտտվել զորամասով, հանդիպել եւ զրուցել զինվորների հետ: Զինվորները դպրոցականների հետ զրույցում նշում էին, որ կարեւոր է կապը հասարակության եւ բանակի միջեւ: Բանակում դժվարությունները շատ են, սակայն դրանք էլ կոփում են իրենց:
Կարդացեք նաև
Aravot.am-ի հետ զրույցում Վազգեն Սարգսյանի անվան զորամասի զինվոր Հարություն Վարդանյանը պատմեց, որ Հնդկաստանից է եկել՝ Հայաստանում ծառայելու համար: 12 տարի այլ լեզուներով՝ հնդկերենով եւ անգլերենով հաղորդակցվելուց հետո դժվարանում էր հայերեն խոսել, բայց այստեղ՝ հենց բանակում էլ մայրենին մշտապես կիրառելու շնորհիվ այժմ տիրապետում է լեզվին:
Մանրամասները՝ տեսանյութում:
Զորամասի հրամանատարի ԱՀՏԱ-ի գծով տեղակալ, փոխգնդապետ Արթուր Թումանյանը մեզ հետ զրույցում ընդգծեց, որ իրենք շատ կարեւորում են բանակի դերը ապագա սերնդի դաստիարակության գործում, եւ պատահական չէր, որ միջոցառումը կազմակերպվել էր դպրոցի հետ համատեղ: «Ապագա զինվորականների դաստիարակությունը պետք է սկսել հենց մանկապարտեզից»,- ասաց նա՝ նշելով, որ իրենց զորամասին կից մանկապարտեզներում էլ են պարբերաբար միջոցառումներ իրականացնում: «Այցելում ենք մանկապարտեզներ: Օրինակ՝ անցած տարի ամռանը կազմակերպված զորահանդեսին զորքից հետո հրապարակով անցան նաեւ մանկապարտեզից խմբեր»,- ասաց փոխգնդապետ Թումանյանը՝ ավելացնելով՝ իրենք կարեւորում են բանակ- հասարակություն կապի պահպանումը: «Այսօր այստեղ էին նաեւ երկրապահները, եւ սա հիանալի հնարավորություն էր, որպեսզի երեք սերունդ հանդիպի. ներկա զինվորները հանդիպեցին իրենցից առաջ հայրենիքին ծառայած եւ արդեն ծառայության սպասող ապագա զինվորներին»:
Հռիփսիմե ՀՈՎՀԱՆՆԻՍՅԱՆ
