Շիրակի մարզի դատախազ Րաֆֆի Ասլանյանն Aravot.am-ին փոխանցեց, որ Գյումրու ռուսական հյուպատոսարանի շենքի մոտակայքում տեղի ունեցած բախումների փաստի առթիվ հարուցված քրեական գործի շրջանակներում որևէ դատավարական կարգավիճակ ունեցող անձ դեռևս չկա: Դեռևս վկաներ են հարցաքննվում, վարկածներ են քննարկվում:
Ըստ նրա, անխուսափելի էր քրեական գործի հարուցումը, քանի որ կան տուժածներ, ընդ որում, ըստ դատախազի, չպետք է շեշտել միայն ոստիկանների տուժած լինելու փաստը, քանի որ կան նաև տուժած քաղաքացիներ: «Մարդիկ պիտի հարցաքննվեն, որպեսզի տեսնենք առնչություն ունե՞ ն, չունե՞ն կամ ի՞նչ չափով ունեն դեպքերին: Եվ այս պատճառով ավելորդ խուճապ ստեղծել պետք չէ », -ասում է Րաֆֆի Ասլանյանը:
Թեև բերման են ենթարկվել բազմաթիվ քաղաքացիներ, սակայն դեռ չկան վարչական պատասխանատվության ենթարկված անձինք, քանի որ այս պահին հնարավորություն չկա պարզելու` ով է վարչական խախտում կատարել, ով` քրեորեն պատժի ենթակա հանցանք: Այս հարցի պատասխանը պարզ կդառնա փաստի առթիվ հարուցված քրեական գործի նախաքննության ընթացքում:
Նունե ԱՐԵՎՇԱՏՅԱՆ
