Դերասան Արտաշես Ալեքսանյանը, որը նկարահանվել է Հակոբ Հակոբյանի հեղինակած «Հիշողություն» ֆիլմում, Aravot.am-ի հետ զրույցում զարմանք հայտնեց` իմանալով, որ պրոդյուսեր Հակոբ Հակոբյանին ձերբակալել են:
Մեր այն դիտարկմանը, թե նրա համար անակնկալ էր, որ ֆիլմի պրոդյուսերը ապօրինի ձեռնարկատիրության մեջ է մեղադրվում, Արտաշես Ալեքսանյանն ասաց. «Ես ոչ տնտեսագետ եմ, ոչ` մասնագետ, ես դերասան եմ, լուրն էլ առաջին անգամ ձեզնից եմ լսում: Դերասանը հո չի՞ գնալու հետաքրքրվի մարդկանց գործունեությամբ, նրանց աշխատանքով, դերասանն իր գործն անում` թողնում գնում է հաջորդ գործին»:
Մեր այն հարցին էլ, թե անձամբ ճանաչո՞ւմ է Հակոբ Հակոբյանին, շփվե՞լ է նրա հետ, պարոն Ալեքսանյանն ասաց. «Ես առանձնապես Հակոբ Հակոբյանի հետ չեմ շփվել ինձ առաջարկել են, ես գնացել եմ, շփվել եմ օպերատորի հետ, ռեժիսորի հետ եւ այնպես էր, որ ես պետք է համ սերիալում նկարահանվեի համ` նրա ֆիլմում, ժամանակ չեմ ունեցել շփվելու ոչ մեկի հետ: Անձամբ իր հետ առաջին օրն եմ շփվել, ու ճանաչել, երբ ինքն ինձ առաջարկեց խաղալ իր ֆիլմում»:
Լուսինե ԲՈՒԴԱՂՅԱՆ