Սառնաղբյուրցի ազատամարտիկ Մարտիրոս Ալեքսանյանին, որի 21-ամյա որդուն` Մնացական Մարտիրոսյանին, որպես Գյումրիում տեղի ունեցած բախումների մասնակից, երեկ ձերբակալել էին Շիրակի մարզի դատախազ Րաֆֆի Ասլանյանի (լուսանկարում) որոշմամբ, այսօր չի հաջողվել մտնել այդ նույն դատախազի մոտ:
Մարտիրոս Ալեքսանյանը Aravot.am-ի հետ զրույցում ասաց, որ ինքը շատ էր ուզում հանդիպել դատախազին ու խնդրել, որ ազատ արձակեն իր որդուն, քանի որ վերջինս երկրից փախնող չէ: «Րաֆֆի Ասլանյանը իր հյուրերին էր ճանապարհում, գլխավոր դատախազությունից եկածներին, ես նրան հանդիպեցի նախասրահում, նա ասաց, որ իմ հետ հանդիպել է երեկ, հիմա ոչինչ չի կարող ասել: Դատախազը ինձ հորդորեց` աժիոտաժի չենթարկվել, ասաց` հո ձեր որդին մարդասպան չէ՞, կառաջնորդվենք օրենքով: Բայց ես հայր եմ, ո՞նց կարող եմ հանգիստ նստել, չանհանգստանալ, ի՞նչ է արել իմ որդին, ինչո՞ւ հարյուրավոր մարդականց միջից ընտրեցին հատկապես նրան: Ես նրան տղամարդավարի խոստում եմ տալիս, որ երբ պետք լինի, Մնացականը կգա հարցաքննության, թող գործը քննեն, ճշմարտությունը բացահայտեն, մենք չենք խոչընդոտի, բայց նրան թող ազատ թողնեն, նա հանցագործ չէ»,- մղկտում էր հայրը:
Նշենք, որ այսօր Սառնաղբյուրի բնակիչները, հավաքելով գյուղի կենտրոնում, արդեն իսկ հանդես են եկել նախազգուշացմամբ, եթե 72 ժամվա ընթացքում ազատ չարձակեն իրենց արժանապատիվ համագյուղացուն, հետևանքները շատ վատ են լինելու , կփակվի Գյումրի-Երևան մայրուղին ու կսկսվեն անժամկետ բողոքի ակցիաները:
Հավելենք նաև, որ դեռևս երեկվանից մենք գրավոր հարցում էինք ուղարկել ՀՀ գլխավոր դատախազի խորհրդական Քրիստինե Մելքոնյանին` հետաքրքրվելով, թե ի՞նչ հիմքով են ձերբակալել երիտասարդին և ինչո՞վ կբացատրեն ՀՀ քննչական կոմիտեի նախագահի խորհրդական Սոնա Տռուզյանի այն պարզաբանումը, որ քննիչը առարկել, բողոքարկել է հսկողությունն իրականացնող դատախազի վերոհիշյալ անձին ձերբակալեու ցուցումը: Մինչև այս ժամը պատասխան չենք ստացել: Մեր տեղեկություններով, հսկող դատախազը ցուցում է տվել Մնացական Ալեքսանյանին ձերբակալել, իսկ քննիչը, հրաժարվելով այն կատարել, միանգամից բողոքարկել է Շիրակի մարզի դատախազ Րաֆֆի Ասլանյանին: Դրանից հետո հսկող դատախազը անձամբ է ձերբակալել: Հսկող դատախազի համար հիմք հանդիսացել է այն, որ քննիչը իրավունք չուներ առանց իր ցուցումը կատարելու բողոքարկել, այսինքն խախտում է թույլ տվել, պիտի կատարեր, նոր բողոքարկեր:
Կարդացեք նաև
Այսօր Գյումրի ժամանած գլխավոր դատախազի տեղակալն էլ խուսափեց հանդիպել իրեն սպասող լրագրողների հետ` հաղորդելով, որ հարցերի չի պատասխանելու:
Նունե ԱՐԵՎՇԱՏՅԱՆ
Ուր է գնում Հայաստանը… Բավական է միայն նայել այս մարդու դեմքին և ամեն ինչ պարզ կդառնա: Չակերտների բացումը թողնում եմ ձեզ 🙁