Սպանված Ավետիսյանների հարազատները պահանջում են, որ գտնեն իրական հանցագործին ու պարտադիր պատժեն Հայաստանի Հանրապետությունում՝ մեր արդարադատությամբ: «Մի հոգի չէր սպանեցին, անցավ, գնաց, կորավ, փակվեց… Եթե Հայաստանի Հանրապետությունում է սպանդը տեղի ունեցել, ինչո՞ւ այստեղ չպիտի դատվի, ի՞նչ գործ ունի ոճրագործը ռազմաբազայում, մեր բողոքը հենց այդ է: Չգիտես ինչու՝ ոչ մեկը ոչ մի բան էս ուղղությամբ չի կարող անել»,- դժգոհում էին հարազատները:
Նրանք թեեւ գիտակցում են, որ յոթ հոգու սպանությունը բացահայտելն այնքան էլ հեշտ չէ, քանի որ հազար ու մի հարց կարող է միմյանց հաջորդել, բայց իրենց բառերով ասած՝ եթե սրտանց մոտենան գործին, ապա հանցագործությունն անպայման կբացահայտվի: «Մարդիկ ոչ մի դուշման չեն ունեցել, այդպիսի ընտանիք չեն եղել, որ շփված լինեն մաֆիաների հետ կամ ինչ-որ գործերի մեջ ընդգրկված լինեին: Միլիոնների տեր չեն եղել, սովորական հասարակ, բանվոր մարդիկ էին: Այսօրվա դրությամբ Հայաստանի Հանրապետությունում մենք բոլորս քնում ենք, չգիտենք առավոտ կարթնանանք, թե՞ չէ: Հանգիստ չենք մենք, որովհետեւ չունենք պաշտպան, վերեւներից պետք է լինի պաշտպանդ, որ հանգիստ քնես քո հանրապետության մեջ ու արթնանաս: Վախենում ենք…»:
Վերջիններս այդպես էլ չեն հասկանում, թե ի՞նչ կար այս սպանության հետեւում, ինչո՞ւ գազանաբար բնաջնջեցին ընտանիքը, անգամ ձեռք բարձրացրեցին փոքրիկների վրա: Նրանք բացառում են ընտանիքի հոր ու որդու ՌԴ արտագնա աշխատանքի մեկնելու հետ ու այնտեղ ինչ- ինչ խնդիրներ ունենալու վարկածը: Սպանված Հասմիկ Ավետիսյանի քրոջ՝ տիկին Ռիտայի ասելով, ընտանիքի հայրը մեկնել է Անապա, Կրասնոդար, Չիտայի կողմերը երբեք չի եղել: Նրան իր մանկության ընկերն է տարել ՌԴ: Իսկ տան տղան առաջին անգամ էր գնում արտագնա աշխատանքի, ընդ որում 3 ամիս է այնտեղ գտնվել: Հարազատների համոզմամբ, եթե նրանց նկատմամբ թշնամանք ունենային ու փորձեին վրեժ լուծել, ապա հենց ՌԴ օդանավակայանում «գլուխներին կսարքեին»:
Նրանք համոզված են, որ սպանությունը մեկ հոգու ձեռքի գործ չէ: «Այդ 6-7 հոգանոց տունը վերջը 4-5 հոգին մեծ, հասուն մարդիկ են եղել, եթե մի սենյակից սկսեր մեկին կրակել, գոնե մի երկուսը կպաշտպանվեր: Կարող է 3-ը սպանվեին, 4-ը , բայց ոչ 6- 7-ը, վերջին սենյակին էլ դուռ է եղել, կարող էր դուռը փակեր, հեռախոսներն էլ կողքը, կզանգեին…»:
Կարդացեք նաև
Տիկին Ռիտան տեղեկացրեց, որ ռուս քննիչները իրեն հարցաքննել են հենց առաջին օրը, հետագայում հարցաքննել են նաեւ հայ քննիչները, քանի որ ինքը գործով վկա է, հենց դեպքի օրը ինքն է առաջինը մտել Ավետիսյանների տուն:
Նունե ԱՐԵՎՇԱՏՅԱՆ
