Ռուս սահմանապահ զորքերի պայմանագրային զինծառայող 26-ամյա Արթուր Աֆյանին դեռ չի հաջողվել հայտնաբերել, չնայած որ նրա մոտ կա բջջային հեռախոս:
Aravot.am-ի հետ զրույցում Մարմաշենի գյուղապետ Աշոտ Եղոյանը, որը լավ է ճանաչում Արթուրին, քանի որ վերջինս աշխատում է իր որդու հետ, ասաց.«Որ ասում են՝ նա պարտքեր ունի ու այդ պատճառով է անհետացել, ես նրան որպես լավ ճանաչող անձ, աբսուրդ եմ համարում: Նա ամսական 50 հազար ռուբլի աշխատավարձ է ստացել: Ընդունենք, որ ռուսական ռուբլին 3-4 ամիս շարունակ արժեզրկվել է, բայց հո էնքան չէր արժեզրկվել, որ նա չկարողանար իր պարտքերը տալ: Տեղյակ եմ, որ կնոջ զարդերը ամսի 16-17-ին բանկ են դրել, գումար վերցրել, բայց էլի եմ կրկնում, չեմ հավատում, որ նա նորածին երեխային ու կնոջը կարող էր լքել պարտքերի պատճառով: Նա համարյա 7-8 տարի աշխատում է սահմանապահ զորքերում: Նախքան ամուսնանալը հաճակի էր մեր տուն գալիս, շաբաթը առնվազն 2-3 անգամ, լռակյաց, ինքնափոփ տղա է: Արտակարգ տիրապետում է համակարգչին, աշխատելու ընթացքում «Մերսեդես» մանկիշի մեքենա գնեց, գործերը լավ էին, և եթե անգամ 10 հազար դոլար պարտք ունենար, նա չէր լքի 2-3 ամսական իր երեխային, հատկապես որ նրա համար պարտք փակելը այնքան էլ դժվար չէր, ամսե-ամիս կտար, բարձր աշխատավարձ էր ստանում: Երևի ուրիշ խնդիրներ կան, ով գիտի…», ասաց գյուղապետը:
Նա նաև ասաց, որ իրեն տեղեկություններ են հասել այն մասին, որ Արթուրը անցած տարի իր ծննդավայր Իջևանից նոր անձնագիր էր ստացել, բայց հինը մնացել էր իր մոտ: Ըստ գյուղապետի, այս տեղեկությունը, իհարկե, պիտի ճշտվի:
Ոստիկանությունից տեղեկացրեցին, որ շարունակվում են որոնողական աշխատանքները: Հիշեցնենք, որ վերջինս փետրվարի 21-ի գիշերը ժամը 1.30 սահմաններում վերջին անգամ խոսել էր հայրական տանը՝ Մարմաշեն գյուղում գտնվող իր կնոջ հետ , դրանից հետո հեռախոսը անհասանելի էր դարձել: Ոստիկանությունը Գյումրիում Շիրակացի փողոցի 7 բ շենքի 44 հասցեում վարձակալած նրանց տանը զինվորական համազգեստի գրպանից հայտնաբերել էր երկտող, որտեղ վերջինս կնոջից ներողություն էր խնդրում՝գրելով.«Կներես, սուտը քանդեց մեր տունը»:
Կարդացեք նաև
Նունե ԱՐԵՎՇԱՏՅԱՆ
