Շիրակի մարզի քննչական բաժնում բավական երկար՝ մոտ 2-2,5 ժամ հարցաքննելուց հետո քիչ առաջ քրեական գործ է հարուցվել Ավետիսյանների սպանությունից հետո Գյումրու ցույցերին մասնակցած երկրորդ անձի՝ 26-ամյա Անուշավան Հարությունյանի նկատմամբ՝ ՀՀ քրեական օրենսգրքի 258- հոդվածի 3-րդ մասի 1-ին եւ 2-րդ հոդվածներով: Հոդվածը կոչվում է « Խուլիգանություն»:
Երիտասարդը լրագրողների հետ զրույցում ասաց, որ իրեն ոստիկանություն են հրավիրել որպես կասկածյալ , հարցաքննել են ու մեղադրանք առաջադրել: Այնուհետ բաց են թողել ստորագրությամբ՝ քաղաքից չհեռանալու պայմանով: Ոստիկանները նրան զանգահարել են կանչել ոստիկանություն ու ծանուցագիրը ձեռքն են տվել: Ըստ նրա՝ սա իր երկրորդ հարցաքննություն է, առաջին անգամ որպես վկա են հրավիրել: Տղան չի հասկանում, թե ինչ հասարակական կարգ է ինքը խախտել, ըստ նրա, ինքը ցույցի է մասնակցել, բայց ոչինչ չի արել:
Ոստիկանների համար հիմք հանդիսացել է տեսանյութը: Անուշավանն ասում է, որ ինքը տեսանյութում կանգնած է, խոսում է, ոչ մի ավելորդ բան չի անում: Անուշավան Հարությունյանը երեկ տոմս էր գնել արտերկիր մեկնելու՝ արտագնա աշխատանքի, սակայն ստիպված է եղել հետ տալ՝ տուժվելով 60 հազար դրամ:
«Քանի որ մեր երկիրը շատ «լավն է», գնում ենք դուրսը աշխատելու: Ես դեմ չեմ, թող մեղավորներին գտնեն ու պատժեն, բայց ես չեմ զղջում ցույցերին մասնակցելու համար, ինչո՞ւ պիտի զղջամ , ի՞նչ եմ արել»,-ասաց երիտասարդը: Ի դեպ, նա փաստաբան չուներ, ըստ նրա, կարիք էլ չունի, որովհետեւ ինքը կարող է իր իրավունքները պաշտպանել: Երիտասարդը անգամ չգիտեր, թե իրեն առաջադրված մեղադրանքով ինչ պատիժ է սպասվում: «Չեմ էլ հարցրել, ինձ հետաքրքիր էլ չէ, ես ինձ մեղավոր չեմ ճանաչում»,-հայտարարեց նա: Հիշեցնենք, որ այս նույն հոդվածի 4-րդ մասով մեղադրանք էր առաջադրվել Ավետիսյանների դաժան սպանության պատճառով ոտքի ելած եւս մեկ ցուցարարի՝ սառնաղբյուրցի Մնացական Մարտիրոսյանին:
Կարդացեք նաև
Իսկ Անուշավան Մարտիրոսյանին առաջադրված մեղադրանքը հետեւյալն է
- Խուլիգանությունը՝ դիտավորությամբ հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով եւ զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաեւ ուրիշի գույքը ոչնչացնելով կամ վնասելով՝ պատժվում է ուղղիչ աշխատանքներով՝ առավելագույնը վեց ամիս ժամկետով, կամ կալանքով՝ մեկից երեք ամիս ժամկետով, կամ ազատազրկմամբ՝ առավելագույնը երկու տարի ժամկետով:
- Հասարակական կարգը կոպիտ կերպով խախտելը, որը զուգորդվել է բացառիկ ցինիզմով՝
պատժվում է ուղղիչ աշխատանքներով՝ առավելագույնը մեկ տարի ժամկետով, կամ ազատազրկմամբ՝ առավելագույնը երեք տարի ժամկետով:
- Սույն հոդվածի առաջին կամ երկրորդ մասով նախատեսված արարքը, որը՝
1) կատարվել է մի խումբ անձանց կամ կազմակերպված խմբի կողմից,
2) զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով:
Նունե ԱՐԵՎՇԱՏՅԱՆ
Սպանդի մեջ կասկածվող ռուս զինվորը գտնվում է ռուսական բազայում, որը Հայաստա՛նի տարածք է: Սպանդի մեջ կասկածվող ռուս զինվորը կոպտորե՛ն խախտել է ՀՀ օրենքը: Այսինքն՝ ՀՀ իրավապահ մարմինները պիտի ԱՆՄԻՋԱՊԵՍ գնան և կալանավորեն մեղադրյալին: Սա՛ է օրենքը:
Սեփական քաղաքացիների հանդեպ ՀՀ իրավապահ մարմինների դուխը 1000 է: Որտե՞ղ է հիմա՛ ձեր «դուխը». գնացե՛ք ու ձերբակալե՛ք հայ ընտանիքին ոչնչացրած ոճրագործ կասկածյալին, այլ ոչ թե ՎԱԽԿՈՏ ու պատժիչ թատրոն խաղացեք՝ ի շահ Ռուսաստանի: Հիշեք՝ ստրուկին միա՛յն արհամարհում են: