Պաոլո Կոսսիի, Ժան-Բլեզ Ջիանի և Ժան Վարուժան Սիրապյանի «Նեմեսիս գործողությունը. Սողոմոն Թեհլերյան» գիրքն ընթերցողին արդեն հասանելի է նաև հայերենով ու ռուսերենով (400-ական օրինակ):
Գրքի համահեղինակ Ժան Վարուժան Սիրապյանի խոսքով` գրքի ֆրանսերեն, անգլերեն, հունարեն տարբերակներն ավելի վաղ են լույս տեսել: Ֆրանսիայում, օրինակ, արդեն 2000 օրինակ սպառվել է: Նախատեսվում է գիրքը հրատարակել նաև թուրքերեն ու գերմաներեն, որից հետո այն կուղարկվի Թուրքիա:
Գիրքը պատկերապատումներով ներկայացնում է «Նեմեսիս» գործողությունն ու Սողոմոն Թեհլերյանի կողմից Հայոց ցեղասպանության գլխավոր կազմակերպիչ Թալեաթ փաշայի գնդակահարության պատմությունը: Այստեղ կան նաև Հայոց ցեղասպանությունը փաստող ուշագրավ նյութեր, արժեքավոր քարտեզներ, ինչպես նաև Սողոմոն Թեհլերյանի կյանքն ու դատավարությունը:
«Սողոմոն Թեհլերյանի մասին շատերը գիտեն, բայց «Նեմեսիս» գործողության պատմությունը քչերին է հայտնի: Կարևոր փաստ է այն, որ այս գործողությամբ սպանվել են թուրքական դատարանի կողմից դատապարտված և փախուստի դիմած թուրքերը, և ոչ մի անմեղ մարդ չի տուժել: Սա ոչ թե ահաբեկչական, այլ վրիժառության գործողություն էր»,- այսօր` գրքի շնորհանդեսի ժամանակ, լրագրողների հետ զրույցում ասաց Ժան Վարուժան Սիրապյանը:
Հայոց ցեղասպանության 100-րդ տարելիցին նվիրված «Նեմեսիս գործողությունը. Սողոմոն Թեհլերյան» գիրքը հայերեն և ռուսերեն լույս է ընծայել «Արեգ» հրատարակչությունը՝ ՀՀ մշակույթի նախարարության և Փարիզի Չոբանյան ինստիտուտի աջակցությամբ:
Սիրանուշ ՀԱՅՐԱՊԵՏՅԱՆ
