Այսօր մասնավոր տաքսիների վարորդները կրկին հավաքվել էին «Հանրապետության» հրապարակում` բողոքելու կառավարության սահմանած լիցենզիաների եւ հարկավճարների կարգի դեմ: Նրանք հրաժարվում են կատարել նոր կարգի պահանջները:
Վարորդներն Aravot.am-ին այսպես ներկայացրին իրենց դժգոհությունները. «Մեր բողոքը լիցենզիաների դեմ է, որը չենք ուզում, չենք կարողանում դրա տակից դուրս գալ: Լիցենզիան պահանջում է հաշվիչ եւ այլն եւ այլն: Մոտավորապես 70-80 հազար դրամ ու ամեն ամիսն էլ պիտի 12 հազար դրամ փող մուծենք: Հաշվիչ պիտի առնենք, որը 60 հազար դրամ է: Հազիվ աշխատում ենք ու եթե օրվա հացի փող դուրս է գալիս, ուրախ ենք լինում»:
Վարորդներից մեկն էլ, չցանկանալով ներկայանալ, ավելի անկեղծացավ. «Հիմա ավելին ասեմ ու ձայնագրիր: Սրանք հաշվիչ են բերել եւ ուզում են վրաներս ծախեն, ուզում են հետներս փայատեր մտնեն, հետո էլ հայտարարեն, թե այսքան աշխատատեղ ենք ստեղծել: Բայց որ պահանջում ենք մեր աշխատանքը թոշակի համար ստաժ հաշվեն. նման բան չկա, ապառիկ վերցնելու, բանկից օգտվելու համար թուղթ չենք կարող տանել: Ես բարձրագույն կրթություն ունեմ: Այսօր վերեւներում նստածները ինձանից գրագետ չեն: Հիմա, որ իրենց բախտը բերել է ու իրենք այնտեղ են նստած, իսկ ես, որ աշխատել եմ ու մի հիմար ղեկավարի պատճառով անգործ եմ մնացել ու հիմա տաքսի եմ քշում, ի՞նչ են ուզում ինձանից: Գողություն ե՞մ անում: Սպասարկում եմ մեկին, նա ինձ երկու կոպեկ փող է տալիս` տանում իմ երեխեքին եմ տալիս: Այն էլ` չեմ հասցնում, մի կերպ բանկերն եմ փակում», – ասաց վարորդը:
Աշոտ ՀԱԿՈԲՅԱՆ
