Նիկոլայ Բաղդասարյանի կարծիքով՝ վերաքննիչ բողոքը ներկայացնելուց հետո տուժող կողմը ապահովագրական ընկերությունից չի կարող ստանալ իրեն հասանելիք գումարը
Դերասան Վարդան Պետրոսյանի գործով տուժող կողմի փաստաբան Ռուբեն Բալոյանը մարտի 2-ին վերաքննիչ բողոք է ներկայացրել:
Այս առնչությամբ Aravot.am-ը զրուցեց Վարդան Պետրոսյանի պաշտպան Նիկոլայ Բաղդասարյանի հետ: Նա համարում է, որ վերաքննիչ բողոք ներկայացնելը բացասական կերպով կանդրադառնա ե՛ւ տուժող կողմի, ե՛ւ ամբաստանյալ Վարդան Պետրոսյանի վրա:
«Տուժող կողմը ապահովագրական ընկերությունից չի կարող ստանալ իրեն հասանելիք գումարը, իսկ եթե չբողոքարկեին, յուրաքանչյուր տուժող կարող էր ստանալ մինչեւ 3 միլիոն 300 հազար գումար, այդ թվում նաեւ՝ մահացած երեխաները: Արթուր Հակոբյանը կարող էր ստանալ իր բուժման համար գումար, Տաթեւիկ Հակոբյանն էլ կարող էր ստանալ արդեն իսկ վճարված եւ ապագայում բուժումը կազմակերպելու գումարը: Երբ որ իրենք բողոքարկում են իրենք ո՛չ կարողանում են այդ գումարը ստանալ, ո՛չ էլ կազմակերպել Տաթեւիկ Հակոբյանի բուժումը»,- ասաց նա
Կարդացեք նաև
Նիկոլայ Բաղդասարյանը հավելեց, որ Վարդան Պետրոսյանը, ըստ Հայաստանի Հանրապետության օրենսդրության, երբ որ դատական ակտը ուժի մեջ է մտնում՝ հնարավորություն է ունենում իր պատիժը կրել բաց ռեժիմով. դա ենթադրում է, որ նա մեկուսարանից դուրս է կրում այդ պատիժը, այսինքն՝ փաստացի ազատության մեջ է գտնվում:
Ամի ՉԻՉԱԿՅԱՆ
