«Մեր գործը թողած հիմա ընդդիմությամբ պետք է զբաղվենք: Ընդդիմությունը սկսել է մեկը մյուսի նկատմամբ արշավ կազմակերպել եւ ամեն մեկը փորձում է ցույց տալ, որ միակն է, իրենից բացի ընդդիմություն չկա: Ընդդիմությունը պետք է փորձի համախմբվել: Քառյակ, հնգյակ, եռյակ էին փորձում անել, չստացվեց, պետք է հիմա փորձեն իշխանությունների հետ աշխատել, ոչ թե հասարակությանը հիասթափեցնեն: Իշխանությունը միշտ նպաստել է, որ ընդդիմությունն իր կարծիքն արտահայտի հրապարակներում ու ԱԺ-ում, իշխանությունը մեղավոր չէ, որ ընդդիմությունը չի ցանկանում օգտվել իր ասելիքն արտահայտելու հնարավորությունից»,- այսօր «Հայելի» ակումբում ասաց ՀՀԿ-ական պատգամավորը:
Քաղաքական, հասարակական գործիչ Ազատ Արշակյանն էլ ամեն ինչում իշխանությանն է մեղադրում. «Եթե չունենք ընդդիմություն, իշխանությունն է մեղավոր: Իշխանությունը ոչ թե պետք է սարքի ընդդիմություն իրեն հարմար ու խոցելի, նախօրոք պարտված ընդդիմություն, այլ պետք է օրենսդրական գործիքակազմով պայմաններ ստեղծի, որ իրեն փոխարինի ընդդիմությունը: Պետք է իշխանությունը պատրաստի իրեն փոխարինողին, իսկ այս առումով իշխանություններն անելիք ունեն»:
Նա առաջ քաշեց նաեւ կուսակցությունների, ընտրությունների մասին օրենքների անհրաժեշտությունը:
Ըստ նրա, քաղաքական դաշտում ստեղծված գաղջ մթնոլորտի արդյունքում ունենք 70 կուսակցություն, իսկ ԱԺ-ում 70 կթվոր ու կթվորուհի, որ իրենց խոսքը չեն ասել: Հետո դիմեց ՀՀԿ-ական պատգամավորին. «50 տոկոս գործիչներ ունեք ԱԺ-ում, պետք է կարողանաք պայմաններ ստեղծել, որ չկարողանանք ասել, որ ձեր օրենքների կիրառության արդյունքում ընդդիմությունը խեղճացած է…
Կարդացեք նաև
ՀՀԿ-ի հեծանավը Գետառով լողում է, պայմաններ ստեղծեք, որ գոնե Հրազդան գետով ուրիշ նավ լողա»:
Ըստ Սուքիաս Ավետիսյանի այնպես չէ, որ ընդդիմադիր դաշտում ներուժ չկա, պարզապես պետք է փորձեն համագործակցել ոչ թե մեկը մյուսին խորտակել.« Կան կարծիքներ, որ իշխանությունն է ընդդիմության խորտակման պատճառը, բայց ընդդիմությունն է մեկը մյուսին խորտակում՝ հայտարարելով՝ ես միակն եմ, ինձնից բացի ուրիշը չկա»:
Ազատ Արշակյանն էլ է ընդդիմության դաշտում ներուժ տեսնում. «Ներուժ կա թե կուլտուրայի առումով, թե կան կադրեր, թե ծրագիր»:
Անդրադառնալով 1-ին նախագահի վերջին ելույթին՝ Սուքիաս Ավետիսյանը կարճ ասաց՝ հասարակության առջեւ նման ելույթ նախկին նախագահը չպետք է ունենար, իսկ Ազատ Արշակյանն ասաց, որ նա պետականաշինության ու պատերազմում հաղթած նախագահ է ու կարող է հիմա «թուլանալ», նույնիսկ հեգնել քաղաքական մյուս ուժերին:
Արփինե ՍԻՄՈՆՅԱՆ
