Ներկայումս ԱԺ-ում քննարկվում է «ՀՀ նախագահի վարձատրության, սպասարկման եւ անվտանգության ապահովման մասին» օրենքում լրացումներ եւ փոփոխություններ կատարելու մասին կառավարության ներկայացրած օրինագիծը:
Ինչպես տեղեկացրել ենք, կառավարությունն այդ նախագծով առաջարկում է ՀՀ պաշտոնաթող նախագահի համար սահմանել հատուկ կենսաթոշակ` ՀՀ նախագահի աշխատավարձի 70 տոկոսի չափով: Ըստ կառավարության, որոշ կատեգորիաների պետական պաշտոններ զբաղեցրած անձանց համար սահմանված է կենսաթոշակի հաշվարկման կարգ` ելնելով նրանց համար սահմանված աշխատավարձի չափից: Արդյունքում` այդ անձանց կենսաթոշակի չափն էականորեն բարձր է ՀՀ պաշտոնաթող նախագահի կենսաթոշակի չափից: Ուստի անհավասար պայմաններ են: Առաջարկվում է նաեւ սահմանել, որ Հայաստանի Հանրապետության պաշտոնաթող նախագահը կահավորված գրասենյակով պետք է ապահովվի ցմահ: Ներկայիս գործող օրենքով, պաշտոնաթող նախագահը կահավորված գրասենյակով ապահովվում է մինչեւ իր 70 տարին լրանալը:
Քննարկման ժամանակ ՀՀԿ խմբակցության պատգամավոր Խոսրով Հարությունյանը աշխատանքի եւ սոցիալական հարցերի նախարար Արտեմ Ասատրյանից հետաքրքրվեց՝ «Պատգամավորների համա՞ր էլ է գործում այն կարգը, որ նրանց կենսաթոշակը պետք է լինի գործող պատգամավորի աշխատավարձի ինչ-որ տոկոսը: Դուք այնպես ներկայացրեցիք, ոնց որ բոլոր պաշտոնյաների համար է այդ մոտեցումն ամրագրված: Ինչո՞ւ նախագահի, դատավորների, տարբեր տեսակի պետական չինովնիկների համար դա կարող է լինել, բայց ոչ բոլորի վրա տարածել»: Նա նաեւ հետաքրքրվեց՝ նախագծում նշված է, որ կենսաթոշակը չի վճարվում այն ամբողջ ժամանակահատվածում, որի ընթացքում պաշտոնաթող նախագահը զբաղեցնում է որեւէ ընտրովի կամ նշանակովի պաշտոն. «Ես չեմ հասկանում, այդ հատուկ թոշակը կենսական խնդիր չի լուծում: Դա պաշտոնաթող նախագահի՝ հանրային կյանքում ճանաչելի դերակատարումն ընդգծող պարգեւավճար է: Ի՞նչ կապ ունի՝ նա աշխատո՞ւմ է, չի՞ աշխատում: Եթե սոցիալական խնդիր եք լուծում, մի բանվոր պակա՞ս սոցիալական խնդիր ունի, որ ՀՀ նախագահին այդպես առանձնացնում եք: Չէ՞ որ ճանաչում ենք սրանով նրա կարեւոր դերակատարումը: Ինչո՞ւ եթե նա անցնում է աշխատանքի, թոշակ պետք է չստանա: Ինչ է, մենք դադարո՞ւմ ենք ճանաչել նրա պատվավոր դերակատարումը: Ինձ համար հասկանալի չի ձեր մոտեցումը: Ինչո՞ւ եք դա դիտում որպես կենսապահովման խնդիր: Եթե այդպես է, դա շատ քիչ է»:
Արտեմ Ասատրյանը պարզաբանեց, որ ներկայիս օրենքով կենսաթոշակի հաշվարկման միասնական կարգ էր սահմանված: Այդ մոտեցումը փոխվել է: Միասնական է դարձել բանվորի համար էլ, պետական պաշտոն զբաղեցնողի համար էլ: Պետական պաշտոն զբաղեցրած անձանց համար սահմանված է գործակիցը եւ հիմնական կենսաթոշակի չափը բազմապատկվում է այդ գործակցով:
Կարդացեք նաև
Արտեմ Ասատրյանը սկզբունքորեն դեմ չէր, որ կենսաթոշակի փոխարեն ամրագրեն պարգեւավճար բառը. «Երբ խոսում ենք կենսաթոշակի մասին, կենսաթոշակը կորցրած եկամտի հատուցում է: Սահմանել 70 տոկոս, դա իր տրամաբանություն ունի: Կարող ենք քննարկել, որ դրա անունը ոչ թե կենսաթոշակ դնենք, այլ՝ պարգեւավճար: Օրենքն ամրագրում է հատուկ կենսաթոշակ տերմինը: Ունենք տեսակները՝ տարիքային, աշխատանքային եւ այլն: Սա կոչվելով հատուկ կենսաթոշակ, իր մեջ պարունակում է այն իմաստը, որ պաշտոնաթող նախագահի ինստիտուտի նկատմամբ հատուկ վերաբերմունքն է՝ կենսաթոշակի տեսքով: Սկզբունքային խնդիր չկա անվանումը փոխելու»:
ՀՅԴ պատգամավոր Արծվիկ Մինասյանն էլ հարցրեց. «Գրասենյակի հետ կապված, փաստորեն 70 տարին լրանալու բառերը հանելով՝ մենք ասում ենք, որ գրասենյակը հատկացվում է անժամկետ: Հետեւաբար, կարո՞ղ է գրասենյակը օգտագործվել հետագայում իր ժառանգների կողմից, եւ բնակարանն էլ ժառանգվո՞ւմ է, թե՞ ոչ: Եվ հետո, քննարկվե՞լ է պաշտոնաթող բոլոր նախագահներին նույն տարածքում բնակարան հատկացնելու հնարավորությունը: Թող իրար հետ մի քիչ էլ շախմատ խաղան, զբաղվեն, հանդիպեն, սուրճ խմեն, զրուցեն, գուցե պաշտոնաթող նախագահների մոտ ագրեսիան մի քիչ նվազի:
Արտեմ Ասատրյանի խոսքերով՝ գործող օրենքով ամրագրված է, որ պաշտոնաթող նախագահին բնակարանը տրամադրվում է սեփականության իրավունքով, իսկ կահավորված գրասենյակը հատկացվում է օգտագործման իրավունքով: Կահավորված գրասենյակն ու ավտոտրանսպորտը առաջարկվող օրենքով պետք է տրամադրվի ցմահ՝ օգտագործման իրավունքով: Իսկ թե բնակարանն ընդհանրապես որտեղ է տրամադրվում եւ ինչպես, ես դրա վերաբերյալ տեղեկատվություն չունեմ»:
Հռիփսիմե ՋԵԲԵՋՅԱՆ
