ՌԴ նախագահ Վլադիմիր Պուտինը ստորագրել է «ՀՀ և ՌԴ կառավարությունների միջև ՌԴ տարածքում ՀՀ քաղաքացիների և ՀՀ տարածքում ՌԴ քաղաքացիների գտնվելու կարգի մասին» համաձայնագրի վավերացման մասին օրենքը:
Ըստ այդ համաձայնագրի՝ Հայաստանի տարածքում ժամանակավոր գտնվող Ռուսաստանի քաղաքացիները եւ Ռուսաստանի տարածքում ժամանակավոր գտնվող Հայաստանի քաղաքացիները ազատվում են 30 օրվա ընթացքում իրավասու մարմիններում գրանցվելու պարտավորությունից:
Այս կապակցությամբ Aravot.am-ը զրուցեց ՀՀ տարածքային կառավարման և արտակարգ իրավիճակների նախարարության միգրացիոն պետական ծառայության պետ Գագիկ Եգանյանի հետ: Նա նշեց, որ այդ վավերացումը չի կարող ազդել Ռուսաստան Դաշնություն մեկնող Հայաստանի քաղաքացիների հոսքի աճի վրա. «Ուղղակի այդ համաձայնագիրն ասում է՝ եթե առաջ այդ մարդիկ 30 օրվա ընթացքում պետք է հաշվառման կանգնեին, հիմա նրանց ավելի երկար ժամանակ է տրվում: Մեր քաղաքացու համար ավելի հարմարավետ իրավիճակ է ստեղծվում. ինքը բացի այդ հաշվառումից ուրիշ գործեր ուներ անելու եւ այդ օրերի ընթացքում նրա մոտ լարվածություն կառաջանար»:
Aravot.am-ի հարցին, թե այս համաձայնագրից հետո նա հնարավո՞ր ՝է համարում, որ Ռուսաստանի քաղաքացիները հոսքը Հայաստան ավելանա, Գագիկ Եգանյանը պատասխանեց. «Ուղղակի ե՛ւ ռուսների համար, ե՛ւ հայերի համար սկզբնական շրջանում փոխադարձ այցելությունները դյուրին կլինեն: Չեմ կարող ասել, թե դա ինչին կնպաստի: Կապել դա տուրիստական կամ աշխատանքային միգրանտների հոսքի հետ տեղին չէ»:
Կարդացեք նաև
Ամի ՉԻՉԱԿՅԱՆ
