Ղարաբաղ կոմիտեի անդամ Աշոտ Մանուչարյանի գնահատմամբ ԵՏՄ անդամ երկրների ղեկավարների հանդիպմանը Սերժ Սարգսյանի չմասնակցելը ներքին խնդիրներ ունի:
«Խոսքը գնում է եռյակի մասին՝ Լուկաշենկո, Պուտին, Նազարբաեւ: Փաստացի անցկացվում է ԵՏՄ ղեկավարության հավաք, որին Հայաստանից ոչ ոք չի հրավիրվում: Սա պատճառ ունի, երեք ղեկավարները ի տարբերություն
Սերժ Սարգսյանի, ներկայացնում են իրենց ժողովուրդներին, եռյակի նախագահները հեղինակություն ունեն իրենց երկրներում: Իսկ Սերժ Սարգսյանը ներկայացնում է միայն երկրի օլիգարխիան»,- ասաց Աշոտ Մանուչարյանը:
Նրա խոսքով, ՀՀ իշխանության համար փողը աստված է, հանուն փողի պատրաստ են ամեն ինչի՝ եւ երկիրը վաճառել, եւ մարդկանց գնդակահարել. «Իսկ ԵՏՄ անդամ մյուս երկրներում փողն աստված չէ: Օրինակ Ռուսաստանում հենց սկսվեց ճգնաժամը, սանկցիաները, միանգամից կրճատվեցին պետական ծախսերը՝ ճոխությունները, ինչ կատարվեց Հայաստանում: Բարձրացվեց նախագահի, պատգամավորների, պետական այլ պաշտոնյաների աշխատավարձերը:Բարձրացրին արտասահմանյան գործուղումներին հատկացվող գումարները՝ հիսուն միլիոն դրամով: Մեկն ինձ բացատրեր՝ ինչ է Սլովենիայում անում ԱԳ նախարարը կամ Գերմանիայում ինչ է անում գյուղնախարարը, ինչ է փոխվում նրանց ճանապարհորդություններից Հայաստանի համար: Թե ինչ է փոխվում իրենց համար, հասկանում եմ»:
Կարդացեք նաև
Նրա մեկնաբանմամբ, ԵՏՄ այսօրվա հավաքից ոչ թե Սերժ Սարգսյանի չի դուրս մնաց, այլ Հայաստանի օլիգարխիան. «ՀՀԿ-ն պետք է որոշում կայացնի ու ելք գտնի այս ամենից: ՀՀԿ-ն կազմաքանդում է երկիրը: Այսօր ընդդիմության բոլոր այրերը մնացել են անգործ, էական բան չունեն մոտ շրջանում առաջարկելու: Բոլորը համաձայն են, որ երկիրը կազմաքանդվում է, բայց ոչինչ չեն առաջարկում, ոմանք առաջարկում են մեկ ամսից սկսել, ոմանք՝ երեք տարի հետո: Բայց երկիրը ոչնչացվում է ու այսպես չի կարող գոյատեւել»:
Արփինե ՍԻՄՈՆՅԱՆ
