«Որեւէ ընդդիմություն, որն իրեն ընդդիմություն է համարում ու փողի իշխանությունից չի հրաժարվում, ընդդիմություն չէ: Ո՞վ է այսօր մեր հանրապետության հայտնի, հարգված դեմքը, օլիգարխը, նրա թիկնազորի պետը, սա երկրի ավարտն է: Իսկ ստեղծված իրավիճակում, Եթե որեւէ ընդդիմություն չի ասում, թե ինչպես է հաղթահարելու այս ամենը ու միակ հարցը, որ քննարկում է այն է, թե ինքը՞ կլինի, Ծառուկյա՞նը թե՞ Սերժը, դա ընդդիմություն չէ: Ընդդիմությունը պետք է ասի՝ ոնց է երկրին վերադարձնելու բնականոն արժեհամակարգը»,- անդրադառնալով ԲՀԿ-ի ընդդիմադիր դառնալու հայտարարությանը՝ ասաց Ղարաբաղ կոմիտեի անդամ Աշոտ Մանուչարյանը:
Նրա խոսքով, Հայաստանի քաղաքական դաշտում իշխում են օլիգարխիական կուսակցությունները՝ ԲՀԿ-ն ու ՀՀԿ-ն.
«Փողը պետք է դուրս գա քաղաքականությունից: Տնտեսականը մտել թե պետական, թե հոգեւոր ոլորտ: Փողի քրմերը՝ օլիգարխները, պետք է գան ու բոլորիս գնդակահարեն մարտի մեկին, պետք է արժեհամակարգը վերածեն այնպիսի արժեհամակարգի, որ թոռը պապուն, պապը թոռանը սպանի հանուն փողի, որ եղբայրը քրոջ վրա խաղաթուղթ խաղա ու պարտվի, եւ քույրը գնա ինքնասպանությամբ կյանքը ավարտի»:
Սահմանային միջադեպերին ու խաղաղ պայմաններում զինվորների մահացության դեպքերին անդրադառնալով՝ պարոն Մանուչարյանը շարունակեց. «Եթե մեր կառավարությանն այսօր ասենք, որ սահմանին զինվորների սպանությունները դուք եք կազմակերպում, կասեն՝ էդ ոնց: Ինչի համար են սպանվում մեր զինվորները, որովհետեւ փողերը, որոնք պետք է տրամադրեին սահմանին, տարան լափեցին, տրամադրեցին ճամփորդություններին, հաճույքներին: Ես նրանց համարում եմ մեր երիտասարդներին սպանողներ: Սպանության մեղադրանք կներկայացնեի, եթե չիմանայի, որ հոգեխանգարում ունեն, պետք է փողը հավաքեն ու սպառեն հաճույքների համար»:
Կարդացեք նաև
Արփինե ՍԻՄՈՆՅԱՆ
