Նոր բեւեռ ստեղծելու ու համագործակցության հնարավորությունները այլ քաղաքական ուժերի հետ ճշտելու նպատակով այսօրվանից ԱԻՄ-ը քաղաքական ուժերի հետ հանդիպումներ կսկսի: Այսօր երեկոյան հանդիպում է նախատեսված «Ժառանգության» գրասենյակում:
«Տեսակետ» ակումբում ասուլիսի ժամանակ Պարույր Հայրիկյանն ասաց, որ կուսակցությունների հետ հանդիպումների օրակարգում Սահմանադրական բարեփոխումների հարցն է. «Եթե մինչեւ վերջերս ես Սահմանադրական բարեփոխումների տրամաբանության մեջ չէի տեսնում հայասպանությունը, ապա այս երկու- երեք օրերին ինձ համար ակնհայտ դարձան հայ ազգի քաղաքական սպանության փորձերը»:
Նրա խոսքով, Լեւոն Տեր Պետրոսյանը Սահմանադրությունը գրեց իր համար, հետո Ռոբերտ Քոչարյանը փոփոխություններ մտցրեց իր օգտին. «Հիմա եկել է Սերժ Սարգսյանն ու ասում է՝ ինչ անենք, որ ժողովուրդը նախագահ չընտրի, հենա մենք գյադեքին կհավաքենք ու գյադեքով կընտրենք: Սրանք ցեղասպանության 100-ամյակի նախաշեմին խոսում են հայ ազգի քաղաքական միտքը նվազագույնի հասցնելու մասին, ինչը նշանակում է ոչնչացում»:
Նա քննադատեց քաղաքական ուժերին, որոնք բոլոր սահմանադրական փոփոխությունների վերաբերյալ միայն կարծիքներ են հայտնում, հետո ասաց, որ ԱԻՄ-ը այդ փոփոխությունների հայեցակարգ է ներկայացրել, որը ցույց է տալիս, թե որ դեպքում քաղաքացիների դերակատարությունը կմեծանա: Նա զարմանում է՝ ինչո՞ւ իշխանությունը այդ հայեցակարգին չի անդրադառնում. «Ինչո՞ւ չեք անդրադառնում, ո՞րն է պատճառը, որ լկտիաբար աշխարհին հայտարարում եք, թե այլ հայեցակարգ չկա»:
Կարդացեք նաև
Արփինե ՍԻՄՈՆՅԱՆ
