Մարտի 18-ին Նարեկացի արվեստի միությունում կայացավ webtv.am հայկական մշակութային ինտերնետ հեռուստատեսության «Հարություն» ֆիլմի պրեմիերան՝ նվիրված հայ մեծ կոմպոզիտոր Հարություն Դելլալյանին: 25 տարի առաջ Հարություն Դելլալյանը անժամանակ հեռացավ կյանքից՝ իր ստեղծագործական կարճ ժամանակահատվածում թողնելով ստեղծագործություններ, որոնք հայ երաժշտական արվեստի գանձարանում իրենց ուրույն տեղն ունեն:
Սերված լինելով Հայոց Մեծ Եղեռնը վերապրած գերդաստանից, Մեծ ներգաղթի տարիներին վերաբնակվելով Հայաստանում, Հարություն Դելլալյանը համառորեն իր քայլերն արեց դեպի հայ երաժշտություն և իր ստեղծագործություններով ճանաչելի դարձրեց մաքրամաքուր հայ երաժշտությունը՝ լինելով հայ դասական հնչողության մեջ նորարարության կնքահայրերից: Նրա «Նվիրում Կոմիտասին», «Հաղթական Ռեքվիեմ», «Topophono» և այլ ստեղծագործություններ համաշխարհային ճանաչում և հնչողություն ձեռք բերեցին: Նրա ստեղծագործությունները կատարել են աշխարհահռչակ շատ երաժիշտներ և ստեղծագործողներ՝ այդ թվում և հայազգի երգեհոնահար Պերճ Ժամկոչյանը, Հասմիկ Պապյանը, Արամ Ղարաբեկյանը, դաշնակահար Արթուր Փափազյանը և այլոք:
Դրանք հնչել են Քարնեգի Հոլում, աշխարհի շատ հայտնի բեմերում: Ֆիլմում Հարություն Դելլալյան մարդու անցած ճանապարհի արժևորումն էր, անդրադարձը Դելլալյան կոմպոզիտորին՝ նրա ընտանիքի անդամների, գործընկերների, մտերիմների զգացմունքային պատումներով և Հարություն Դելլալյանի երաժշտությամբ: «Հայ նորագույն երաժշտության համատեղության մեջ իր ուրույն տեղն ունի, իր մնայուն տեղը, որը կարծում եմ, որ այլևս ընթացքի մեջ է, որը նրան տանում է դեպի դասականություն». Սա կոմպոզիտոր Տիգրան Մանսուրյանի՝ Հարություն Դելլալյանի մասին ֆիլմում հնչած խոսքից է, իսկ Հասմիկ Պապյանի գնահատմամբ Հարությունն այն մարդկանցից էր, որոնք ձևավորում են միջավայր: «Նրա երաժշտությունը, երբ այսօր լսում ենք, կարծես դա երեկ է գրվել: Այնքան արդիական, այնքան թարմ, այնքան ժամանակակից է: Այնքան նոր է մտածելակերպը, երաժշտական մտածողությունը»: Ցուցադրության ավարտին Հարություն Դելլալյանի մասին խոսք ասացին ֆիլմի հեղինակը՝ webtv.am մշակութային ինտերնետ հեռուստատեսության տնօրեն Արայիկ Մանուկյանը, հայ երաժշտության վարպետներ Սեդրակ Երկանյանը, Դանիել Երաժիշտը, Հարություն Դելլալյանի երիտասարդության տարիների ընկերները: Ցուցադրությանը ներկա էր և խոսք ասաց նաև Հարություն Դելլալյանի դուստրը՝ «Դելլալյան տրիո»-ի և Պորտուգալիայի ազգային սիմֆոնիկ նվագախմբի ջութակահարուհի Նարինե Դելլալյանը: Ֆիլմի համացանցային պրեմիերան առաջիկա օրերին՝ webtv.am հայկական մշակութային ինտերնետ հեռուստատեսությամբ:
