Ադրբեջանի սամբոյի ֆեդերացիայի նախագահ Ջեյհուն Մամեդովը Azerisport.com-ին ասել է, որ սամբիստին 2-3 տարվա որակազրկում է սպասվում: «Սամբոյի եվրոպական ֆեդերացիայի նախագահ Սերգեյ Ելիսեեւը հարցազրույց է տվել, որում հայտարարել է, թե մեր սամբիստ Բախտիյար Աբբասովը կորակազրկվի այն բանի համար, որ Մոսկվայում կայացած Աշխարհի գավաթի խաղարկությունում Հայաստանի օրհներգը հնչելու ժամանակ պատվո պատվանդանին պպզել է:
Սպասվում է, որ Աբբասովը 2-3 տարով կորակազրկվի: Բացի դա, նրանից վերցրել են Աշխարհի գավաթի բրոնզե մեդալը: Ինձ ասել են, որ նրա անունն արդեն ջնջվել է մրցաշարի մեդալակիրների ցուցակից: Ցավալի է: Անկեղծ ասած, ես չհասկացա Բախտիյարին: Սկզբում նա ասաց, թե օրհներգի ժամանակ իրեն վատ է զգացել՝ սիրտն է ցավել, դրա համար է պպզել: Հետո հայտարարեց, թե դա արել է ղարաբաղյան հակամարտության պատճառով», – հայտարարել է Մամեդովը:
Աշոտ ՀԱԿՈԲՅԱՆ
