Անցած տարի ՀՀ սպորտի եւ երիտասարդության հարցերի նախարարությունն ու Երեւանի քաղաքապետարանը առողջ ապրելակերպը եւ մասսայական սպորտը ազգաբնակչության շրջանում քարոզելու ուղղությամբ հանդես եկան համատեղ հետաքրքիր նախաձեռնությամբ: Նրանք «Ազատության» հրապարակում մայրաքաղաքի եւ հյուրերի համար հանգստյան օրերին կազմակերպում էին մի քանի մարզաձեւերի ցուցադրական ելույթներ, որոնց մասնակցում էին ինչպես սկսնակ, այնպես էլ՝ արդեն բավականաչափ փորձ ունեցող մարզիկներ: Նպատակը մեկն էր. օգնել ազգաբնակչությանը, հատկապես աճող սերնդին, անձամբ տեսնել տվյալ մարզաձեւի գրավչությունը, հենց տեղում մարզիչներից ու մասնագետներից տեղեկանալ դրա նրբությունների եւ առանձնահատկությունների մասին եւ ընտրության հարցում կողմնորոշվել:
Այս նախաձեռնության ընթացքում մենք հետաքրքրվել էինք, թե ինչպիսի՞ արդյունքներ են արձանագրվել: Նախարարությունից այն ժամանակ պատասխանել էին, թե սպորտով զբաղվող պատանիների որոշակի աճ արձանագրվել է, ինչը իրենք շատ կարեւոր են համարում:
Երեկ «Առավոտը» նախարար Գաբրիել Ղազարյանից հետաքրքրվեց, թե այս տարի նախաձեռնությունը շարունակություն ունենալո՞ւ է: «Անպայման: Արդեն սկսել ենք նախապատրաստվել: Պարզապես, սպասում ենք, որ եղանակները մի փոքր էլ տաքանան ու կայունանան, որպեսզի սկսենք», – ասաց նախարարը եւ ավելացրեց, որ ցանկություն կա ընդլայնել միջոցառման աշխարհագրությունը՝ ընդգրկելով նաեւ հանրապետության մարզերը, որտեղ անկասկած շատ են բնությունից օժտված պատանիները:
ԱՇՈՏ ՀԱԿՈԲՅԱՆ
Կարդացեք նաև
«Առավոտ»
03.04.2015