Նախօրեին Եվրախորհրդարանի կողմից ընդունված հայոց ցեղասպանությունը դատապարտող բանաձեւը քաղաքական վերլուծաբան Ստյոպա Սաֆարյանի մեկնաբանմամբ, նախազգուշական կրակոց էր Թուրքիային:
«Դա շատ հեղինակավոր փաստաթուղթ էր, որի նպատակը Թուրքիային բան հասկացնելն էր: Թերեւս նաեւ սահմանը բացելու խնդիրն էր, որովհետեւ Թուրքիան ոչ միայն ժամկետներն է սպառել այդ խնդիրը լուծելու, այլեւ ավելի է բարդացրել: Ամենեւին հաճելի չէ Արեւմուտքի համար տեսնել, թե ինչպես է Թուրքիայի կողմից հայոց ցեղասպանության խնդիրը իր վերահսկողության տակ առնելու քայլը: Իհարկե, նաեւ տեսնում են, որ թուրքական քաղաքականությունն ավելի շատ գործընկեր է ռուսական քաղաքականության համար, քան արեւմտյան քաղաքականության համար: Դրա համար էլ, Թուրքիային շառաչուն ապտակ հասցնելով՝ հասկացնում են, որ նվազագույնը պետք է բացի Հայաստանի հետ սահմանները»,- Aravot.am-ին ասաց Ստյոպա Սաֆարյանը:
Նրա խոսքով, եվրոպական համայնքը շատ ավելի պարկեշտ քայլեր արեց քան Հայաստանի ռազմավարական գործընկեր համարվող Ռուսաստանը. «Որը սուսուփուս երկրորդ պատվիրակություն է Նարիշկինի ղեկավարությամբ ուղարկում Ստամբուլ՝ Գալիպոլիի միջոցառումներին մասնակցելու:
Ամբողջ Եվրոպան հստակ մեսիջ է ուղարկում՝ ասելով, որ հասկանում են Թուրքիայի խաղը եւ ամենեւին չեն օգնելու լեգիտիմացնել այդ քաղաքականությունը»:
Կարդացեք նաև
Պարոն Սաֆարյանը եվրախորհրդարանի ընդունած բանաձեւը նաեւ շղթայական ռեակցիա է համարում, որին նախորդել են ԵԺԿ-ի, եվրոպական խորհրդարանի կողմից ցեղասպանության դատապարտումը, Վատիկանի հայտարարությունները, Հռոմի պապի նախաձեռնած պատարագը. «Կարծում եմ կստիպեն Թուրքիային զիջումների գնալ: Դեռեւս էսկալացիա է գնում, այսինքն, հարաբերությունների լարում՝ միջազգային հանրություն Թուրքիա առանցքում, բնականաբար Թուրքիան այս պահին ատամներ կսեղմի նաեւ Հայաստանի վրա, որովհետեւ, այնուամենայնիվ, պատճառը հայկական հարցն է, բայց չեմ կարծում, որ միջնաժամկետ միտումներ ցուցաբերի պահպանվելու, որովհետեւ Թուրքիան աշխարհին դեմ գնալու ռեսուրսները չունի»:
Արփինե ՍԻՄՈՆՅԱՆ
