Սահմանադրական դատարանի իրավախորհրդատվական բաժնի պետ, միջազգային իրավունքի փորձագետ Վլադիմիր Վարդանյանը Սիսի կաթողիկոսարանի տարածքները եւ կից կալվածքները Մեծի Տանն Կիլիկիո կաթողիկոսությանը վերադարձնելու մասին Արամ 1-Ին կաթողիկոսի նախաձեռնած հայցը Թուրքիային համարում է առանձին իրավական գործընթաց:
«Արամ Առաջինը այդ պահանջը բարձրաձայնեց նույնիսկ անգլերենով, որ հասկանալի լինի պատարագի ժամանակ: Այս գործընթացը կարող է ազդել պահանջների բավարարման համատեքստում, բայց չպետք է մոռանանք, որ այս պահանջը ցեղասպանության հանցագործությանն առնչվող հարակից պահանջներից մեկն է, սրանից զատ այլ պահանջներ էլ ունենք, որոնք կարող են ներկայացվել: Չափազանց կարեւոր կարող է լինել, որ այս պահանջը ներկայացվեց բարենպաստ բարոյաքաղաքական ու իրավաքաղաքական կոնտեքստում, բայց տվյալ պարագայում Թուրքիայի նման բիրտ արձագանքի պարագայում, չեմ կարող ասել, թե օբյեկտիվ արդարադատությունը ինչպիսին կլինի Թուրքիայում ու ինչ հաջողության հնարավոր կլինի հասնել, սա երկարատեւ գործընթաց է»,- ասաց Վլադիմիր Վարդանյանը:
Մեր հարցին, թե ինչ զարգացումներ են հնարավոր, երբ դատական հայցը մտնի մարդու իրավունքների եվրոպական դատարան (ՄԻԵԴ), փորձագետն ասաց, որ ՄԻԵԴ-ն ունի իր իրավազորության տիրույթը եւ այն չի կարողանա որակել արարքը՝ որպես ցեղասպանություն, պարզապես փորձելու է փաստել՝ արդյոք տվյալ սուբյեկտի իրավունքները խախտվել են, թե ոչ:
Արփինե ՍԻՄՈՆՅԱՆ
Կարդացեք նաև
