Քանդակագործը զոհված ազատամարտիկի որդի է
Ապրիլի 18-ին Տավուշի մարզի սահմանամերձ Ոսկեվան գյուղում հանդիսավորությամբ բացվեց հայոց ցեղասպանության զոհերի հուշաքար: Կոթողը պատկերում է պատմական Հայաստանի տարածքը, այն հատող խաչ, որը նաեւ սրի է նման, հայոց հավերժության ոգին խորհրդանշող նուռը: Հուշաքարը գտնվում է 1990թ. բացված Զորավար Անդրանիկի արձանի կողքին: Հուշաքարի կառուցման նախաձեռնությունը պատկանում է Ոսկեվանից սերված Լորիս Սաֆարյանին: Քանդակագործը ոսկեվանցի քանդակագործ Արթուր Մելքոնյանն է, ում հայրը՝ Անուշավան Մելքոնյանը 1992թ. հունիսի 8-ին հերոսաբար զոհվեց Ոսկեվանի սահմանագոտում:
Տեր Սահակ քահանան ոգեկոչեց եղեռնի անմեղ զոհերին, Ոսկեվանի միջնակարգ դպրոցի աշակերտները իրենց ելույթներում արտահայտվեցին 1915թ. ցեղասպանության՝ որպես հայոց անանց վշտի մասին: Հուշաքարի բացմանը մասնակցում էին եւ ելույթ ունեցան ծագումով Ոսկեվանից ԱԺ պատգամավոր Լյուդմիլա Սարգսյանը, ոսկեվանցի քաղաքագետ Ստյոպա Սաֆարյանը, Տավուշի մարզպետի տեղակալ Լեւոն Սարգսյանը, Ոսկեվանի գյուղապետ Սերյոժա Ալեքսանյանը : Միջոցառմանը ներկա էին Ոսկեվանի հարյուրավոր բնակիչներ, բազմաթիվ հյուրեր:
Կարդացեք նաև
Ոսկան ՍԱՐԳՍՅԱՆ
