Ի հեճուկս միջազգային ֆինանսական կազմակերպությունների, որոնք Հայաստանում անկում են կանխատեսում, առաջին եռամսյակում վիճակագրական ծառայությունն արձանագրել է տնտեսական ակտիվության ավելացում։
Ինչպես հայտնի է, Արժույթի միջազգային հիմնադրամի օրերս հրապարակած գնահատումներով Հայաստանում սպասվում է համախառն ներքին արդյունքի մինչեւ 1 տոկոս կրճատում։ Մի փոքր ավելի լավատես է ՀԲ-ն. հնարավոր է համարում 0,8 տոկոսանոց աճ, բայց չի բացառում անկման հավանականությունը։
Այս գնահատականների հետ համակարծիք չէ կառավարությունը։ Դա է վկայում անցած շաբաթվա վերջին վարչապետի արած հայտարարությունը, որը, ըստ էության, կառավարության պատասխանն էր միջազգային կազմակերպություններին։
Ըստ այդմ. «Չնայած կան բազմաթիվ կանխատեսումներ, որ ունենալու ենք տնտեսական անկում՝ հաշվի առնելով տարածաշրջանի լարվածությունը, Ռուսաստան-Արեւմուտք հարաբերությունները եւ այն պատժամիջոցները, որոնք կիրառվում են Ռուսաստանի նկատմամբ, այնուհանդերձ համոզված եմ, որ մենք 2015 թվականին արձանագրելու ենք տնտեսական աճ»։ Որպես հիմնավորում Հ.Աբրահամյանը նշել է, որ տարեսկզբի երկու ամիսներին Հայաստանում գրանցվել է 1,8 տոկոս տնտեսական աճ։
Կարդացեք նաև
Կառավարության ղեկավարը տվել է նաեւ առաջին եռամսյակի սպասումների գնահատականը։
-Առաջիկա օրերին տվյալները կհրապարակվեն, եւ կարծում եմ, որ կունենանք 2,5-3 տոկոս տնտեսական աճ։
Վարչապետի այս հայտարարությունից երկու օր անց վիճակագրական ծառայությունը հրապարակեց առաջին եռամսյակի ցուցանիշները։ Դրանց համաձայն, տնտեսական ակտիվությունը տարեսկզբի երեք ամիսներին եղել է 2,5 տոկոս։ Մարտին, նախորդ տարվա նույն ամսվա համեմատ արձանագրվել է ակտիվության 2,2 տոկոսանոց աճ։
Վասակ ԹԱՐՓՈՇՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
