Բացի Մեծի տանն Կիլիկիո կաթողիկոս Արամ Ա-ից Թուրքիայից իրենց կաթողիկոսությանը պատկանած պատմական հողերի վերադարձման դիմումներ են ներկայացրել նաեւ Կոստանդնուպոլսի հայոց պատրիարքությունն ու Երուսաղեմի հայոց պատրիարքությունը: Այս մասին Aravot.am-ին ասաց Ամենայն հայոց կաթողիկոսի մամլո խոսնակ տեր Վահրամ քահանա Մելիքյանը:
«Սիսի կաթողիկոսության պարագայում դիմումը ներկայացրել է ամենայն հայոց կաթողիկոսությունը, իսկ Կոստանդնուպոլսի հայոց պատրիարքության պարագայում որոշ շինություններ արդեն վերադարձվել են պատրիարքությանը: Սա գործընթաց է, որը երկար ժամանակ պետք է առնի, եկեղեցին չպետք է դադարի իր այդ ձգտման մեջ, որովհետեւ, ի վերջո, այդ ամենը մեր նախնյաց քրտինքով ստեղծված ժառանգությունն է, որը մենք պարտավոր ենք վերադարձնել»,- ասաց տեր Վահրամը:
Նրա խոսքով, հայկական տարածքների վերադարձման պահանջատիրության մասին դեռեւս երկու տարի առաջ ապրիլի 24-ի նախօրեին հայտարարություն կատարվեց ամենայն հայոց կաթողիկոսի եւ մեծն տան Կիլիկիո կաթողիկոսի կողմից. «Որտեղ հստակ ասվեց, որ ցեղասպանության ճանաչմանն ու դատապարտմանը պետք է հետեւի նաեւ պահանջատիրությունը, որով ի վերջո մի հսկայական մշակութային հոգեւոր ժառանգությունը, որ պատկանում է մեր եկեղեցուն ու ժողովրդին, եւ այսօր դեռ կանգուն է ու կա, պետք է վերադարձվի տիրոջը: Այդ իմաստով Արամ Ա-ի՝ կաթողիկոսության կալվածքները վերադարձնելու պահանջը նորություն չէ: Սա գործընթաց է, որն ամբողջ եկեղեցու կողմից է իրականացվում»:
Արփինե ՍԻՄՈՆՅԱՆ
