«Ազատ դեմոկրատներ» կուսակցության անդամներն այսօր Ծիծեռնակաբերդի հուշահամալիր գնացին կուսակցության նախագահ Խաչատուր Քոքոբելյանի գլխավորությամբ:
Պարոն Քոքոբելյանը Aravot.am-ի հետ զրույցում ասաց, որ աշխարհի արձագանքը հայոց ցեղասպանության ճանաչման ու դատապարտման գործընթացում սկիզբ դրեց անշրջելի գործընթացի. «Թուրքիան ինքնամեկուսացման է գնում՝ ամբողջ քաղաքակիրթ աշխարհին դեմ գնալով: Եթե որոշ պետություններ, այդ թվում՝ Ամերիկան, իրենց հարաբերություններից ելնելով, մինչեւ այս պահը ցեղասպանությունը պետական մակարդակով չեն ընդունել, ապա դա չի նշանակում, որ այդ գործընթացն իր հստակ առաջընթացը չունի: Վստահ եմ, որ կարճ ժամանակ հետո, Թուրքիան ստիպված կլինի առերեսվել պատմության իր ամոթալի էջի հետ»:
Ըստ նրա, Թուրքիան չի ընդունում հայոց ցեղասպանությունը երկու պատճառով. «Առաջինը՝ հոգեբանական մոտեցումն է, մյուսը՝ մտավախությունը, թե ինչ իրավական հետեւանքներ կառաջանան ճանաչումից հետո»:
Խաչատուր Քոքոբելյանը ճիշտ չի համարում տարածքային պահանջատիրության հարց բարձրացնելը, նրա կարծիքով պետք է սահմանափակվել ցեղասպանության ճանաչման պահանջով. «Զուտ հողային պահանջատիրության խնդիրն այսօր շոշափել արդյունավետ չեմ համարում: Մենք առայժմ խոսում ենք ցեղասպանության փաստի իրավական առումով ընդունման խնդրի մասին, որն ուղղակի քաղաքակիրթ աշխարհի պարտքն է: Հողային կամ այլ պահանջատիրական խնդիրներ առաջ բերելը կարող է խոչընդոտել այս փուլում ցեղասպանության բուն փաստի ճանաչման խնդրին»:
Կարդացեք նաև
Արփինե ՍԻՄՈՆՅԱՆ
